Првата посета на детето во театар претставува ново и интересно искуство. Проучете што тој месец се нуди како детски претстави по театрите. Доколку на детето една од омилените сликовници му е Грдото пајче, можете за почеток да одите на таа претстава бидејќи во одреден дел ќе биде запознаено што ќе се случува во неа. Дома може да направите сопствен импровизиран театар, од картони. Направете свои кукли или едноставно земете мали фигури/плишани играчки и нека детето ужива во играњето одредени улоги.
Одењето во театар на децата им нуди спој на имагинација, креативност и интеракција, Главните ликови во речиси секоја детска претстава ги прашуваат за помош и совети во одредени ситуации, поттикнувајќи ги на коментари за време на претставата. Децата заедно аплаудираат и пеат, па дури може и да заиграат заедно. Салата одѕвонува од детска смеа, а на крајот се слуша и весело плескање со рачињата.
СОВЕТИ:
- Купете карти неколку дена порано, ако планирате да одите на некоја актуелна и барана претстава. Ако купувате на лице место потрудете се да дојдете половина час порано, заради наоѓање на подобро место за седење со детето.
- Бирајте претстави кои одговараат на степенот на развој на детето, за да не се случи да на постаро дете претставата брзо му здодее.
- Децата понекогаш знаат да се уплашат од бучната музика или костимите на глумците. Ако тоа се случи, изнесете го детето надвор на неколку минути да се смири.
- Имајте со себе секогаш вода или сокче за детето.
- Препуштете се на заедничкото уживање со детето.
