Повеќето бебиња губат дел, а некои бебиња дури и цела коса во првите неколку месеци од животот и тоа е сосема нормално. Постојат неколку причини за тоа, а кај многу бебиња новата коса расте додека старата коса опаѓа, па промената никогаш нема ни да ја забележите, пишува „Хелтлајн“.
Причини за губење на косата
Постојат неколку причини зошто на бебињата им опаѓа косата, но во повеќето случаи тоа не е поврзано со некој поголем медицински проблем. Повеќето влакна опаѓаат во првите шест месеци, а врвот се случува околу третиот месец.
Нивото на хормоните кај бебето се менува по раѓањето, па опаѓањето на косата е еден од несаканите ефекти, исто како и кај мајките. Ако забележите дека бебето на некои места изгубило коса, набљудувајте го како спие или седи на седиштето. Можно е да поминува многу време во иста положба или да ја врти главата на истата страна, триејќи ја на површината.
Други состојби кои можат да предизвикаат губење на косата се многу ретки кај деца помлади од 12 месеци. Лишаи и слични габични инфекции на скалпот може да предизвикаат слабеење и опаѓање на косата, како и прекумерното кубење на бебето на косата.
Експертите не препорачуваат никакви третмани бидејќи косата обично се обновува до првата година
Ако забележите округли и целосно ќелави делови на главата, можно е бебето да има автоимуна состојба наречена алопеција ареата каде што се нападнати фоликулите на влакната. Недоволно активната тироидна жлезда или хипофиза исто така може да ја предизвика оваа појава.
Повеќе време на стомаче
Експертите не препорачуваат никакви третмани бидејќи косата обично се обновува до првата година. Не постои начин да го стимулирате растот на косата, но ако се сомневате на лишаи или алопеција, консултирајте се со лекар за да поставите дијагноза и да спречите понатамошно опаѓање.
Опаѓањето поради триење можете да го намалите со тоа што детето ќе поминува повеќе време на стомаче, но запомнете дека до година дена секогаш треба да го ставате вашето бебе да спие на грб, додека не научи да се превртува самостојно.
Користете благ бебешки шампон и не ја мијте косата на вашето бебе премногу често. Не ја тријте, туку нежно масирајте со влажна крпа со кружни движења.
