Иако многу истражувања претходно покажале дека подрастично опаѓање на плодноста не се случува пред 40-тата година и дека не треба да се плашите од неплодност во триесеттите, ново истражување покажало уште една предност на бременоста по 35. година. Истражувањето е објавено во списанието Journal of the American Geriatrics Society, а истражувачите откриле дека подоцнежната бременост позитивно влијае на мозокот на мајката, односно го спречува губењето на помнењето подоцна во животот.
Истражувањето се темелело на 830 жени во постменопауза и било тестирано нивното вербално помнење, функционални вештини и општи знаења. Истражувачите ја проучувале возраста кога жените го добиле својот прв менструален циклус, возраста кога жените забремениле, бројот на бремености и уште некои фактори за да го проценат влијанието на бременоста и возраста на жената со нивното ментално здравје.
Тие откриле дека учесничките чија последна бременост била по 35-тата година имале подобро помнење, а оние кои својата прва менструација ја добиле пред 13-тата година, имале подобро општи спознанија. Исто така, истражувањето покажало дека жените кои своето прво дете го имале на возраст помеѓу 15 и 24 години, имале полошо здравје и функционални вештини во своите четириесети години.
Зголемувањето на нивото на хормоните за време на бременоста позитивно влијае на мозокот на мајката, а истражувачите заклучиле дека поради подоцнежната бременост овие позитивни промени во мозокот траат подолго. „Иако не е доволно за да ги советуваме жените да чекаат до 35-тата година за да родат уште едно дете, нашите сознанија за позитивното влијание на бременоста по 35-тата година врз здравјето на мајката подоцна во животот се многу значајни“, вели авторката на истражувањето, д-р Роксана Карим.
