За подобро да ја разберат чувствителноста и инфективноста кај децата, истражувачите од Универзитетот во Хаифа во студијата, објавена во журналот „PLOS Computational Biology“,вклучиле 637 домаќинства чии членови во пролет 2020 биле тестирани со PCR-тестови за COVID-19
Луѓето на возраст под 20 години имаат двојно помала веројатност да се заразат со коронавирус, а исто така и помала веројатност дека ќе го пренесат вирусот на други луѓе, открива ново истражување.
Претходните студии покажаа дека постои разлика во симптомите и клиничката слика кај младите и кај постарите лица заразени со коронавирус. Покрај тоа, истражувачите објавија дека кај помал број на деца бил дијагностициран COVID-19 отколку кај постарите лица.
За подобро да ја разберат чувствителноста и инфективноста кај децата, истражувачите од Универзитетот во Хаифа во студијата, објавена во журналот „PLOS Computational Biology“, вклучиле 637 домаќинства чии членови во пролет 2020 биле тестирани со PCR-тестови за COVID-19. Некои лица, исто така, биле подложени и на серолошки тестови за да се утврди дали имаат антитела на вирусот SARS-CoV-2.
Истражувачите откриле дека луѓето под 20-годишна возраст биле 43 проценти помалку осетливи на COVID-19 отколку луѓето постари од 20 години. Тие исто така откриле дека децата имаат помала веројатност да го пренесат коронавирусот на други луѓе.
Покрај тоа, децата имаат поголема веројатност да добијат негативен PCR-тест, иако се заразени, а тоа може да биде и причината што во извештаите на глобално ниво се наведува дека COVID-19 се дијагностицира во помала мера кај децата отколку кај возрасните.
Идните компјутерски истражувања би можеле да помогнат во истрагата на динамиката на пренесување на коронавирус во други средини, како што се старечки домови и училишта, велат истражувачите, а пренесува „Business Standard“.
