Лето е и сигурно планирате некаде да отпатувате на одмор. Не мора да биде на море, може да биде на планина или посета на семејството кое живее далеку. Знаете дека е важно да го испланирате секое патување, а тоа е особено битно кога имате мало бебе во автомобилот со вас. И сигурно се прашувате, особено ако е ваше прво дете, колку време всушност смее бебето да помине на седиштето во автомобил?
Можеби она што ќе го слушнете ќе звучи претерано ригорозно, сепак, треба да имате на ум дека понекогаш статистиката не изгледа баш добро и дека ова ограничување е резултат на бројни истражувања и студии. Затоа, бебе до 6 месеци старост би требало да помине најмногу 2 часа во автомобилско седиште во текот на 24 часа.
Имено, малите бебиња во првите неколку месеци од животот не можат сами да го држат своето тело исправено, а положбата во автоседиштето не им е природна. Покрај тоа, на бебето влијае и движењето на автомобилот, и вибрациите кои се чувствуваат во исто време. Кога безбедносните тестови на бебето во автоседиштето ги зеле предвид и двете, се дошло со заклучок дека кај бебе кое било ставено во автоседиште под агол од 40 степени, биле значително зголемени отчукувањата на срцето и брзина на дишењето, а се намалила и сатурацијата со кислород.
Се разбира, тоа не значи дека треба да престанеме да ги користиме автомобилските седишта. Туку треба да внимаваме колку време бебето поминува во седиштето. Истото важи и за количките во кои бебето е во таква положба, но не и за корпите во кои бебето е во лежечка положба.
Како да го обезбедите бебето во автоседиште:
- Погрижете се бебето да не седи во иста, благо исправена положба повеќе од 2 часа;
- Немојте да го користите автоседиштето како алтернатива на корпа или креветче – како место за спиење (но тоа не значи дека бебето не смее да заспие на седиште додека се вози. Само тоа нека не биде подолго од 2 часа!);
- Ако патувате на подалечни дестинации, застанувајте одвреме навреме и вадете го бебето од седиштето некое време.
