Децата помали од две години не би смееле да користат паметни телефони и таблети или да гледаат телевизија, велат шведските лекари. Шведското здружение на педијатри ги предупреди родителите дека еден час дневно е сосема доволен за децата на возраст од две до пет години.
Според експертите, кои долго време истакнуваат дека децата поминуваат премногу време пред екраните, насочувањето на децата на разумно користење на времето пред екраните е еднакво важно како и подучувањето на добри прехранбени навики или безбедност во сообраќајот.
“Иако екраните можат да прикажуваат корисни информации, да обезбедат забава и да понудат можности за контакт со други луѓе, мозокот на малите деца сè уште не е доволно созреан за да ги апсорбира овие придобивки. Напротив, истражувањата покажуваат дека раната употреба на екраните може негативно да влијае на развојот на децата”. пишуваат Швеѓаните.
Децата користат екрани кога им е досадно
Децата кои редовно користат екрани се повеќе раздразливи, имаат полоша концентрација и полошо ги паметат информациите, истакнаа тие. Исто така, се покажало и дека децата кои поминуваат премногу време пред екрани имаат поголема веројатност да развијат проблеми во однесувањето или депресија во детството.
“За разлика од книгите, дигиталните медиуми често имаат вградени механизми кои ја зголемуваат желбата, што ги тера децата сè повеќе да сакаат да го користат екранот. Голем е ризикот од користење дигитални медиуми кога на детето му е досадно”, пишуваат лекарите.
Светската здравствена организација издаде слични упатства во 2019 година, советувајќи дека децата на возраст под три години не треба да гледаат телевизија или да играат игри на таблети. Децата на возраст од три до четири исто така не треба да поминуваат повеќе од еден час пред екранот дневно. За жал, времето што децата го поминуваат пред екраните нагло се зголеми за време на пандемијата на коронавирус, кога мораа да останат дома поради карантинот и затворањето на училиштата.
