Проблемите во набавката, инфлацијата и повлекувањето на производи предизвикаа недостиг на адаптирано млеко за новороденчиња во САД. Поради тоа на социјалните мрежи се појавија рецепти за доенечка храна од типот „направи сам“, но педијатрите ги предупредуваат родителите да не ги испробуваат бидејќи се опасни.
Неправилната исхрана на доенчињата може да предизвика неколку проблеми, вклучително и електролитен дисбаланс и недостаток на витамини, што може да доведе до напади, проблеми со срцето и проблеми со развојот на коските, велат лекарите
Рецептите станаа вирални на Twitter, TikTok и YouTube, пишува „Блумберг“. Некои објави се отстранети бидејќи ги прекршуваат правилата кои забрануваат медицински дезинформации, но не се сите.
„Ја разбираме потребата да се обидеме да си помогнеме еден на друг, но овие работи се крајно опасни и тоа лесно можете да го видите доколку имате какво било познавање од областа на медицината или нутриционизам“, вели докторката од Тексас, д-р Сами, кој споделува содржини на профилот PediPals на TikTok преку кои се обидува да им помогне на родителите во грижата за своите деца.
Д-р Сами за „Инсајдер“ изјави дека прво видела неколку видеа во кои се промовираат рецепти за формули за бебиња, кои можат да се направат дома, а на крајот сфатила дека тие ги преплавиле социјалните мрежи и станале вирални.
Некои рецепти сугерираат користење состојки како незасладено кондензирано млеко и сируп од пченка. Други содржат семе од коноп, урми без коски и ванила. Има и такви кои им препорачуваат на родителите да ги хранат децата со козјо млеко. А експертите велат дека сите овие алтернативи можат да бидат штетни за доенчињата.
Педијатарот Ана, која ја сочинува другата половина од PediPals, вели дека видеата имаат милиони прегледи и доаѓаат од луѓе кои немаат искуство, ниту се стручни по прашање на педијатриска грижа.
„Тие велат дека тоа им успеало на нив, на нивните мајки и баби, па би требало и на вас. Таквиот совет е опасен. Не постои една работа која им одговара на сите, а формулата е толку истражена и потребно е многу да се работи на неа за да се обезбеди внесување на сите потребни хранливи материи и електролити затоа што бебињата се многу ранливи“, вели д-р Ана.
Лошите рецепти за формули може да доведат до здравствени проблеми за бебињата
Неправилната исхрана на доенчињата може да предизвика неколку проблеми, вклучително и електролитен дисбаланс и недостаток на витамини, што може да доведе до напади, проблеми со срцето и проблеми со развојот на коските, велат лекарите.
„Толку нешта може да се случат, а ако некои не се сретнале со нив, не значи дека и другите нема да се сретнат. Дури и премногу вода може да биде штетно за доенчињата“, додаваат педијатрите, повикувајќи ги родителите на доенчињата и малите деца да бидат внимателни и свесни за дезинформациите кои се шират на интернет.
