Секој родител сака да го види своето дете среќно, па многу често му исполнува некои желби кои баш и не се реални. Ова особено може да се забележи кога родителите трошат неверојатни суми пари на играчки кои се прескапи, досадни и честопати потполно непотребни.
На крајот, тие завршуваат некаде во ѓубре, искршени на парчиња или складирани во некое ќоше затоа што детето не сака да си игра со нив или му станале досадни. Според терапевтот Ејми Тирпак, постојат играчки кои никогаш не би требало да му ги купувате на вашето дете. Таа објаснува за кои играчки станува збор, а пренесува „Net Mums“.
- Бучни пластични играчки
Веројатно не постои родител кој дома нема куп бучни пластични играчки, зарем не? Но, колку и да се вообичаени овие играчки, терапевтот Тирпак има силно мислење за тоа зошто не треба да им ги купуваме на нашите деца.
„Покрај тоа што се здодевни за родителите, не се добри ниту за децата. Истражувањата покажуваат дека ваквите играчки можат да бидат исклучително штетни за децата, особено за помалите, а меѓу другото, можат да го одложат и развојот на говорот“, вели таа.
На листата на забранети играчки се сите оние кои на децата им пружаат пет минути забава, а кога ќе заврши, остануваат со нешто со кое повеќе нема да си играат
- Играчки со многу ситни делови
Тирпак објаснува дека треба да се забранат и играчките со многу делови бидејќи децата не можат да се справат со премногу опции.
„Поради малите парчиња може да дојде до бројни повреди, некои делови детето може да ги проголта, но тоа се само дел од многуте лоши страни на ваквите играчки. Имено, истражувањата покажуваат дека кога децата имаат многу опции на располагање, поверојатно е дека ќе направат хаос и ќе си заминат бидејќи полесно го губат фокусот, расеани се, преоптоварени затоа што едноставно им е премногу“, вели таа.
- Големи играчки
Нив најчесто ги подаруваат луѓе кои немаат деца или барем имаат големи куќи каде што можат да сместат такви играчки. Сепак, Тирпак предупредува дека ова е еден од најлошите видови играчки што може да му ги купите на детето бидејќи децата не само што не можат нормално да си играат со нив, туку зафаќаат и многу простор, што никако не е практично.
„Големите и масивни играчки само ќе заземат многу простор, а многу досегашни истражувања покажаа дека децата подобро напредуваат во простори за игра кои не се пренатрупани. Затоа е најдобро да избегнувате вакви работи, а за тоа задолжително информирајте ги и вашите роднини“.
- Играчки со инструкции
Тирпак објаснува дека никогаш не би им купила на своите деца подарок што доаѓа со упатства. Таа, исто така, не би купила подарок врз основа на нејзините очекувања за тоа како, кога и каде детето ќе го користи.
„На пример, никогаш нема да купам облека за дете и да кажам дека сум мислела дека може да ја облече на првиот училишен ден или да му купам плишано мече за кое се надевам дека ќе спие секоја вечер заедно со него. Мора да им пружиме креативност на децата и независност да изберат дали, како, кога и каде ќе ги користат подароците што им ги даваме, се останато не смееме да правиме“, додава таа.
- Играчки кои на децата брзо им здосадуваат
Последна ставка на листата на забранети играчки се сите оние кои на децата им пружаат пет минути забава, а кога ќе заврши, остануваат со нешто со кое повеќе нема да си играат. Како што објаснува Тирпак, тоа се претежно играчки кои кратко време се забавни за секое дете, а подоцна веќе не си играат со нив.
„Најчесто тоа се играчки кои се популарни во одреден момент, но само тогаш. Освен што ваквите играчки немаат функција, го попречуваат и менталниот развој на детето бидејќи не ја поттикнуваат креативноста, туку имаат исклучиво моментален ефект“, вели таа.
