Доколку планирате да имате деца, не е доволно да се грижите да бидете здрави само во моментот на зачнувањето. Грижата за здравјето започнува многу порано, и притоа не се мисли само на репродуктивното здравје, туку на многу повеќе аспекти.
Имено, научници од Универзитетот во Калифорнија – Риверсајд спровеле истражување кое покажало дека изложеноста на таткото на микропластика може да предизвика метаболички нарушувања кај неговото потомство. Студијата, објавена во списанието Journal of the Endocrine Society, покажала дека ситните пластични честички, кои настануваат со распаѓање на пластиката, значително влијаат врз нашето здравје, а сега е докажано дека влијаат и врз здравјето на следната генерација.
Како што наведуваат во студијата, изложеноста на пластични честички (микропластика) може да предизвика метаболички нарушувања како покачен крвен притисок, висок шеќер во крвта и зголемени телесни масти.
За време на експериментот, истражувачите им давале на глувците исхрана богата со масти, која ги имитира вообичаените нездрави начини на исхрана и ги зголемува метаболичките ризици. Потомството на глувците кои биле изложени на микропластика било посклоно кон дебелина.
Дополнително, било откриено дека женските потомци на машки глувци, изложени на микропластика, биле значително поподложни на метаболички нарушувања во споредба со потомството на татковци кои не биле изложени на микропластика, иако сите потомци биле хранети со иста исхрана богата со масти.
Точните причини за овој полово специфичен ефект сè уште не се целосно јасни, изјавил Чангченг Жоу, професор по биомедицински науки на Медицинскиот факултет при UCR и главен автор на студијата. „Во нашата студија, женските потомци развија дијабетични фенотипови. Забележавме зголемена регулација на проинфламаторни и продијабетични гени во нивните црни дробови – гени кои претходно биле поврзани со дијабетес. Овие промени не се забележани кај машките потомци.“
Истражувачите кај женските потомци забележале и намалена мускулна маса, заедно со зголемена стапка на дијабетес.
За прв пат е покажано дека татковата изложеност на микропластика може да предизвика метаболички дисфункции кај потомството
Со анализа на податоците, тие откриле дека изложеноста на микропластика го менува составот на спермата, поточно значително го менува профилот на малите РНК во сперматозоидите. За разлика од ДНК, која дава упатства за создавање на клетките, овие РНК молекули можат да дејствуваат како „придушувачи на гените“.
„Колку што знаеме, нашата студија е прва што покажува дека изложеноста на таткото на микропластика може да влијае врз профилите на малите некодирачки РНК во сперматозоидите и да предизвика метаболички нарушувања кај потомството“, истакна Жоу.
Тој нагласува дека студијата укажува дека влијанието на пластичното загадување не е ограничено само на поединецот кој е изложен – тоа може да остави биолошки отпечаток кој ги предиспонира децата на хронични болести.
„Нашето откритие отвора нова граница во здравјето на животната средина, префрлајќи го фокусот на тоа како околината на двата родители придонесува за здравјето на нивните деца“, изјавил тој. „Овие наоди од студијата на глувци веројатно имаат импликации и за луѓето. Мажите кои планираат да имаат деца треба да размислат за намалување на изложеноста на штетни материи како што е микропластиката, со цел да го заштитат своето здравје и здравјето на своите идни деца.“
Со оглед на тоа што научниците пронашле микропластика речиси во секој агол од светот, јасно е дека е невозможно целосно да се избегне. Но, можно е да се намали изложеноста на микропластика. Тоа значи избор на природни и непорозни материјали како дрво, стакло или нерѓосувачки челик.
