И во второто полугодие наставата во основните и средните училишта продолжува да се одвива онлајн со исклучок на учениците од прво до трето одделение кои посетуваат настава со физичко присуство во училница
Поради пандемијата, повеќето ученици и во второто полугодие ќе следат онлајн настава се до понатамошно известување. Уште при првото затворање на училиштата, стана кристално јасно дека децата имаат мала мотивација за учење дома – родителите испробаа разни „стратегии“, но опции има се помалку.
Психотерапевтката и советничка Кери Кигли за британски „Мирор“ сподели неколку идеи за тоа како да ги мотивирате децата и да ги скратите училишните маки и за децата и за возрасните:
Наставата во второто полугодие продолжува со истите мерки и препораки, како и досега. И во второто полугодие наставата во основните и средните училишта продолжува да се одвива онлајн со исклучок на учениците од прво до трето одделение кои посетуваат настава со физичко присуство во училница, согласно капацитетите на училиштата за спроведување на планот и протоколите на Министерството за образование и наука и со одобрување од родителите. „Ја следиме епидемиолошката состојба и доколку во следните месеци се покаже стабилизирање ќе донесеме други одлуки, но тоа ќе се случи откако ќе бидеме сигурни дека трендовите со намалување на новозаразени со Ковид ќе продолжат“, истакна министерот за здравство д-р Венко Филипче
Осмислете и држете се до рутината
Рутината е исклучително важна, бидејќи не само што му дава структура на вашиот ден, туку е и ментално корисна.
„Децата учат подобро во структурирана рутина. Каде што е можно, одржувајте доследен образец на спиење, време на оброци и редовни паузи. Ова ќе ви помогне во концентрацијата и нивото на енергија на вашето дете, вели психотерапевтката.
Вашата рутина би требало да биде слична на вообичаениот училишен ден, вклучително и излегувања надвор и редовни паузи.
Ако наставниците и професорите во вашето училиште секој ден задаваат нови задачи, осигурете се дека децата разбираат што треба да направат и ги имаат сите потребни алатки за да ги завршат тие задачи.
Направете систем на наградување
Системот за наградување е одлична мотивациска алатка што наставниците ја користат за да ги охрабрат децата да направат нешто во кое можеби нема да уживаат, наградувајќи ги за нивната напорна работа и добро однесување.
Па, зошто да не може тоа да се направи и дома? Одземањето поени за лошо однесување е добра алтернатива за друга форма на казнување, како што е испраќање во агол или забрана за излегување, бидејќи сето ова ја прекинува вашата рутина и го нарушува вашиот дневен распоред.
„Важно е да запомните да ги фалите и наградувате децата за нивните достигнувања. Тоа ќе има позитивен ефект врз самодовербата на вашето дете и ќе ја поттикне неговата независност“, објаснува Кери.
Задавањето на дневни цели исто така ќе помогне да се зголеми чувството на самодоверба кај децата и ќе ги мотивира да ја постигнат својата цел. За постари деца, обидете се да понудите други видови на стимулации, како што е дополнителен час за гледање филмови или мал подарок за нивниот труд.
Воведете ги во готвењето
Помладите деца сакаат да бидат вклучени во домашните работи и се гордеат кога ќе ги видат плодовите на својата работа. Кери советува „во зависност од количината на време, на секои неколку дена да изберете некој едноставен рецепт, најдобро некој со малку состојки или некој кој бара месење затоа што тоа е многу забавно за децата“.
Користете вага и замолете ги да измерат различни тежини бидејќи тоа ќе им помогне да ги разберат мерењата и нивната секојдневна употреба.
Важно е да запомните да ги фалите и наградувате децата за нивните достигнувања. Тоа ќе има позитивен ефект врз самодовербата на вашето дете и ќе ја поттикне неговата независност
Готвењето поттикнува развој и на низа други вештини:
- Хигиенски вештини како што е важноста на миењето на рацете
- Читање декларации за информации за храната
- Важноста на урамнотежената исхрана и различните групи на храна
- Основни безбедносни вештини, како што се спречување изгореници на тави и шпорет
Охрабрете ги да одржуваат контакти со други луѓе
За време на изолацијата, на децата треба да им се дозволи да се дружат со врсници на безбеден начин, бидејќи и ова е дел од развојот кој во нормални услови го обезбедува училиштето, а сега лесно може да се занемари.
Охрабрете ги да остваруваат видео повици со пријателите, одете на прошетки во природа, однесете ги во театар или на лизгалиште. Знаењето дека ќе комуницираат со некој кој не е постојано во куќата ќе ги расположи и ќе им пружи дополнителен поттик да продолжат да работат во изолација.
