Истражувачите ширум светот трагаат по луѓе кои би можеле да бидат отпорни на вирусот SARS-CoV-2, кој ја предизвикува болеста Ковид-19. Клучот за лекување на оваа болест може да биде во гените на некои луѓе.
Водачот на група истражувачи, имунологот Евангелос Андреакос, рече дека клиничката слика значително се разликува кај заболените од Ковид, при што некои имаат само асимптоматска инфекција, додека на други им е загрозен животот.
„Нашето разбирање за патофизиологијата на Ковид кој претставува закана по живот, значително напредуваше од декември 2019 година, кога болеста штотуку беше опишана, но сè уште знаеме многу малку за човечката генетска и имунолошка основа на вродената отпорност на SARS-CoV-2“, наведе Андреакос.
Иако се уште нема доволно информации за вродена отпорност на вирусот, истражувачите наведуваат дека тоа не значи дека таа не постои. Тие истакнуваат дека понекогаш се заразуваат сите членови на семејството, освен еден.
Претходно беше објавено дека луѓето со одредена крвна група имаат помала шанса да развијат тешка форма на Ковид. Станува збор за лица кои имаат нулта крвна група. Други студии се занимаваа со протеините, како што се рецепторите ACE2 или TMEM41B. Се чини дека овие протеини се неопходни за коронавирусот да влезе или да се размножи во клетката.
Претходно беше објавено дека луѓето со одредена крвна група имаат помала шанса да развијат тешка форма на Ковид. Станува збор за лица кои имаат нулта крвна група
Истражувачите сакаат да пронајдат поединци кои се природно отпорни на SARS-CoV-2 и имаат некои идеи како да го постигнат тоа.
„Прво се фокусираме на неинфицирани контакти во семејства со луѓе со симптоматска инфекција. После тоа, треба да се земат предвид лицата изложени на индексен случај без лична заштитна опрема, најмалку еден час дневно во првите три до пет дена додека траат симптомите кај индексниот случај“, наведуваат тие.
Тоа потоа би се проверило со негативни PCR тестови и негативни тестови на крвта четири недели по изложувањето, со посебен фокус на Т-клетките за да се утврди дали некое лице е заразено. Истражувачите досега пронашле 400 испитаници кои ги исполнуваат критериумите, но бараат и понатаму, пренесува „Science alert“.
