Во текот на пандемијата се повеќе луѓе, од вообичаено, почнаа да страдаат од несоница. Загриженоста за личното и здравјето на најблиските, финансиските проблеми и ограничените социјални контакти предизвикуваат стрес и несигурност.
“Напнатоста е непријател на добриот сон“, вели психологот д-р Ханс Вес, еден од водечките германски стручњаци за пореметувања на спиењето и член на извршниот одбор на Здружението за истражување на сонот на Германија (DGSM).
“Фактот дека деновите ни се помалку структуирани ја влошува ситуацијата“, додава д-р Дора Триш, директор на Лабораторијата за сон во болницата во Нирнберг и член на DGSM.
Лицата кои се присилени да телекомуницираат, на пример немаат просторно растојание помеѓу работното место и местото за одмор. Воедно помалку се изложуваат на дневна светлина и помалку вежбаат.
“Кога поминувате толку време во затворено, телото не ја сфаќа добро дневната промена на светлината и темнината“, вели Триш. “Затоа можеби навечер автоматски нема да бидете поспани“.
Но, некому работата од дома им помага кога се работи за подобар сон, особено на оние кои наутро подолго се мамурни и им е тешко да станат поради работа. Сега можат подолго да спијат и да се чувствуваат поодморено.
Без оглед дали несоницата е поврзана со пандемијата или не, стручњаците за сон имаат неколку совети.
“За лесно да заспиете, мора да се чувствувате безбедно и опуштено, тоа важи за сите“, истакнува Вес, но како тоа да се постигне зависи од човек до човек. “Секој треба да се обиде“.
На многумина им помага ако работити кои го попречуваат сонот ги држат подалеку од спалната соба, вели Вес. И затоа, ако својата спална соба сте ја претвориле во домашна канцеларија, би требало да спиете во друга соба. Ако тоа не е можно, по завршување на работниот ден, одвојте го работното биро со некоја преграда.
Триш советува во креветото да се работи што помалку од она што не е поврзано со спиењето, како што е гледањето телевизија.
“Вашиот ум мора да знае дека креветот е место за спиење“.
Треба да се одвои време и за ментално дистанцирање од секојдневните проблеми пред легнувањето во кревет, а тоа значи да не гледате вести или контактни емисии за пандемијата пред вечерното спиење, оти тоа може да ве вознемири.
Добриот сон зависи и од количината на физичка активност и изложеноста на свеж воздух во текот на денот. Спалната соба треба да биде тивка и замрачена, и пожелно е да се избегнуваат електронски уреди, оти синото светло што го емитираат нивните екрани го спречува отпуштањето мелатонин, хормон кој не прави поспани.
