Во текот на третата недела од животот на бебето започнува интензивна работа на лојните и потните жлезди, и почнуваат да се јавуваат промени на кожата. Ако до тогаш, бебето не сте го капеле во кадичка, ова е период кога е потребно да се започне со таа постапка. Родителите кои немаат искуство, може да побараат помош од патронажната сестра да им ја демонстрира постапката.
Во тој период почнуваат да се оцртуваат самите потреби на кожата на детето, односно дали се работи за масна кожа или за изразено сува и чувствителна. Во таа насока и препораките може да бидат различни.
Децата со нормална и масна кожа може да се капат секојдневно. Козметиката за нега потребно е да се индивидуализира, но не се препорачува секојдневно користење на сапун или шампон. Повеќе пати во текот на неделата користете само вода со неколку капки природно масло.
Кај сувата, перутава и чувствителна кожа се препорачува намалување на бројот на капења на 2-3 неделно во нешто поладна вода – температура 35 или 36 степени. Козметика треба да се користи во договор со педијатарот.
Постарите деца, кога ќе почнат да застануваат на нозе, може да се навикнат на туширање. Не е потребно да се инсистира и да се оди во крајност со секојдневен ритуал на капење, ако родителот не се чувствува добро, детето чувствува дека ќе настине или се лоши временските услови.
