Сигурно сте се запрашале зошто вашето бебе има „страв од паѓање“, нагло се преплашува, замавнува со рацете и го згрчува лицето кога ќе се обидете да го спуштите во креветчето. Или го прави истото кога ќе слушне силен звук. Овој рефлекс, познат како Моров рефлекс, е еден од неколкуте нормални рефлекси присутни кај здрави новороденчиња. Тоа е исто така една од работите што вашиот педијатар ги проверува веднаш по раѓањето и за време на првите контроли на бебето.
Што точно е Моровиот рефлекс?
Како и сите други рефлекси, и овој е несвесен. Спаѓа во групата на т.н. примитивни рефлекси со кои новородените бебиња доаѓаат на свет. И битен е за развојот. Се јавува кога позицијата на главата на вашето бебе нагло ќе се промени или ако главата му падне наназад. Бебето тогаш ги раширува рацете, ги оддалечува од телото, го истегнува вратот и ги шири прстите. Потоа брзо повторно ги спојува рацете, ги свиткува лактите и целосно се опушта. Може да се виткаат и прстите, а бебето може да има исплашен израз на лицето или да заплаче.
Ако Моровиот рефлекс не исчезне по шест месеци, тоа може да биде знак за други проблеми, како што се задоцнети моторни вештини или церебрална парализа
Овој рефлекс прв го опишал австрискиот лекар и педијатар Ернст Моро. Може да се забележи веќе од 25-тата недела по зачнувањето и е присутен до 30-тата недела по зачнувањето. Исчезнува меѓу вториот и шестиот месец од животот, кога бебето станува посилно и успева самостојно да ја држи главата. Односно, колку повеќе се развива мозокот на детето, толку подобро добива контрола над движењата, а рефлексите стануваат непотребни. Така, покрај Моровиот рефлекс ќе исчезне и рефлексот на барање (кога ќе го допрете или погалите по образот или аголот на усните кај новороденчињата, тоа автоматски ќе ја сврти главата на таа страна и ќе ја отвори устата), и рефлексот на цицање (кога нешто ќе го допре неговото непце, бебето ќе почне да цица).
Може да се контролира и поттикне
Моровиот рефлекс може намерно да се предизвика. Кога сте кај лекарот, тој нежно ќе ги повлече рацете на вашето бебе нагоре и ќе ги пушти. Бебето ќе замавнува со рацете, што значи дека мозокот и нервниот систем добро се развиваат. Може да се активира и кога се обидувате да го ставите вашето бебе во креветчето. Кога ќе се наведнете за да го легнете вашето дете, тоа ќе се разбуди од чувството на паѓање. Понекогаш дури може и да се разбудат од длабок сон поради сопствените движења. Ако рефлексите го спречуваат мирниот сон на вашето бебе, обидете се со овие совети:
- обидете се да го спуштите вашето бебе во креветчето хоризонтално, за да не ја навалите главата назад,
- држете го бебето што поблиску до телото додека го спуштате. Пуштете го дури кога неговото тело ќе го допре душекот,
- може да се обидете да го повиете во пелена. Завиткувањето на бебето во пелена ги фиксира рацете така што нема наеднаш да ги рашири. Ова може да го смири вашето бебе и да му помогне да спие подобро. Не заборавајте да го ставите вашето бебе да спие на грб за да го намалите ризикот од синдром на ненадејна смрт на доенчиња (SIDS).
Кога треба да се загрижите?
Не грижете се ако вашето бебе не затрепери секогаш кога го спуштате, на силен звук или светло. Но, ако бебето воопшто нема Моров рефлекс, тоа може да биде знак дека треба да посетите лекар. Моровиот рефлекс што се јавува само на едната страна од телото (асиметрично) може да биде последица на повреда, оштетување на нервите, ‘рбетниот мозок или фрактура на клучната коска.
Ако Моровиот рефлекс не исчезне по шест месеци, тоа може да биде знак за други проблеми, како што се задоцнети моторни вештини или церебрална парализа.
Затоа, не плашете се од Моровиот рефлекс, тој покажува дека се е во ред со вашето малечко. Но, следете и дали ќе исчезне во догледно време. Ако не, контактирајте со педијатарот и проверете ја состојбата на вашето дете.
