ПИШУВА:
Катерина Шекеровска-Димовска
katerina@pedijatar.mk
„Н
еврологијата е обемна медицинска гранка, која опфаќа многу акутни и хронични невролошки состојби, многу заболувања на периферниот и централниот нервен систем, автоимуни состојби, животозагрозувачки состојби каде навистина екстремно брзо треба да се делува“, вели проф. д-р Драгана Петровска-Цветковска, специјалист невролог (ЈЗУ Универзитетска клиника за неврологија) и Претседател на Македонското невролошко здружение. Во пресрет на 7. Конгрес на невролози (7-9 мај), проф. д-р Петровска-Цветковска открива кои се темите за кои ќе се дискутира на претстојниот настан. „Научниот одбор во подготовката на Конгресот, се одлучи на актуелни теми каде последните четири години имаме новитети, но воедно и посуптилни и субспецијални болести и состојби, кои е потребно да се препознаат од секој невролог во државата. Ние сме тие кои работиме и живееме за здравјето на луѓето, зарем не?“, додава проф. д-р Петровска-Цветковска, која објаснува дека неизбежно една од клучните теми на Конгресот секако ќе биде и влијанието на КОВИД-19 инфекцијата врз невролошкиот систем.
Проф. Петровска-Цветковска, живееме во едно немирно и неизвесно време, во кое е многу тешко да се планира, особено кога условите ги диктира КОВИД-19. Сепак, и покрај актуелната ситуација, Македонското невролошко друштво ги прави последните подготовки пред претстојниот 7. Конгрес на невролози со меѓународно учество, кој ќе се одржи онлајн од 7-9 мај. Станува збор за исклучително важен настан со досега најобемна и најамбициозна програма. Дали е тешко во услови на пандемија да се организира еден ваков настан?
Во тек се финалните подготовки од страна на еден исклучително моќен и ентузијастички тим зад нас, кој води до реализација на Конгресот во виртуелна форма во траење од полни три дена
Проф. д-р Петровска-Цветковска: За жал, последната година целиот свет се соочи со пандемија, која донесе екстремно тешки и неизвесни услови на живеење. Се чини се што беше нереално и толку далечно, стана наша реалност. Нереално беше да се живее живот на дистанца, без социјална комуникација, да се адаптира секојдневието на што помалку контакти и дружби, а се со една основна цел превенција на дисперзија на вирусот и што помалку заболени лица со КОВИД-19. Но тоа е што е, човекот е учен да се адаптира и на секакви услови, и не смееме да дозволиме да застанат да течат работите, особено научниот и наставниот дел. Се адаптиравме годинава како наставен кадар, на наше огромно жалење, едукацијата на студентите на Медицински факултет да ја спроведуваме виртуелно со алатки кои ни ги дозволува онлајн наставата. Воедно, организиравме како Македонско невролошко здружение десетина акредитирани стручни невролошки состаноци со цел да споделиме искуства, обновиме и стекнеме нови знаења од областа на неврологијата. Македонското невролошко здружение и Универзитетската клиника за неврологија, има децениска традиција на организација на конгреси на секои четири години, па 7-миот конгрес беше планирано да се одржи во септември 2020 година во Охрид, кој од објективни причини се одложи во исчекување на подобри времиња, кои за жал се се уште толку далеку. Со цел да не ја прекинеме традицијата, сепак Организацискиот и Научниот одбор на Конгресот, во овие екстремно тешки услови, изработи навистина обемна програма се со цел да останеме во тек со науката и новитетите во неврологијата. Во тек се финалните подготовки од страна на еден исклучително моќен и ентузијастички тим зад нас, кој води до реализација на Конгресот во виртуелна форма во траење од полни три дена.
Кои се клучните теми на Конгресот? Што е она што е специфично за 7. издание?
Проф. д-р Петровска-Цветковска: Неврологијата е обемна медицинска гранка, која опфаќа многу акутни и хронични невролошки состојби, многу заболувања на периферниот и централниот нервен систем, автоимуни состојби, животозагрозувачки состојби каде навистина екстремно брзо треба да се делува. Од тие причини навистина е невозможно се да се опфати. Научниот одбор во подготовката на Конгресот, се одлучи на актуелни теми каде последните четири години имаме новитети, но воедно и посуптилни и субспецијални болести и состојби, кои потребно е да се препознаат од секој невролог во државата. Ние сме тие кои работиме и живееме за здравјето на луѓето, зарем не?
Една од клучните теми е секако неизбежното влијание на КОВИД-19 инфекцијата врз невролошкиот систем, кое се регистрира на различни начини дури кај 84% од пациентите. Особено ми е драго што токму на една од сесиите ќе се направи пристап на мултидисциплинарно ниво, со цел да се склопат кариките кои недостасуваат во мозаикот во секојдневата пракса.
На Конгресот како предавачи ќе се јават истакнати домашни, но и странски еминентни експерти од областа на неврологијата. Може ли да ни откриете дел од нивните имиња?
Проф. д-р Петровска-Цветковска: На мое огромно задоволство, и секако на задоволство на Претседателот на организацискиот одбор на Конгресот доц. д-р Иван Барбов, на нашите покани се одзваа многу реномирани невролози од земјата, но и од странство. Морам да ја потенцирам и огромната пријателска соработка со српското и турското невролошко здружение кои не доведоа до успешна реализација на овој огромен проект. Традиција е наставниот кадар да ги пренесе своите искуства на вака големи случувања и таа традиција ја испочитувавме во целост. Многумина се навистина, но ете би ги издвоила од странските предавачи: Академик Костиќ (Србија), Бајкан (Турција), Пиртошек (СЛО), Хабек (Хрватска), Друловиќ (Србија), Турнев (Бугарија), Озтурк (Турција), Сива (Турција) и многу други.
Дел од програмата се и два едукативни курсеви. За што конкретно станува збор?
Проф. д-р Петровска-Цветковска: Програмата ја збогативме со два обемни едукативни курсеви од причина што токму на овие две полиња во последните години бележиме на национално ниво големи промени. Првиот ден тоа е работилницата за спинална мускулна атрофија, каде реномирани предавачи ќе говорат за детската и адултна форма на болеста, како да се препознае, како се лекува, но и кои се новитетите во третман на болеста.
Една од клучните теми е секако неизбежното влијание на КОВИД-19 инфекцијата врз невролошкиот систем, кое се регистрира на различни начини дури кај 84% од пациентите. Особено ми е драго што токму на една од сесиите ќе се направи пристап на мултидисциплинарно ниво, со цел да се склопат кариките кои недостасуваат во мозаикот во секојдневата пракса
Вториот ден е работилницата за акутен третман на исхемичен мозочен удар, исто и во неа ќе земат учество реномирани невролози, неврорадиолози и кардиолози, од причина што е неопходна соработка меѓу нас, повеќе од кога било во минатото, се со цел да се спаси што е можно поголема територија на мозокот кој трпи оштетување од прекин во циркулацијата.
Ќе посветите посебен дел од Конгресот и на младите невролози, но и медицинските сестри и нивната улога во третманот на невролошките пациенти, што дополнително ја збогатува содржината на овој настан. Има ли уште нешто што би издвоиле?
На мое огромно задоволство, и секако на задоволство на Претседателот на организацискиот одбор на Конгресот доц. д-р Иван Барбов, на нашите покани се одзваа многу реномирани невролози од земјата, но и од странство. Морам да ја потенцирам и огромната пријателска соработка со српското и турското невролошко здружение кои не доведоа до успешна реализација на овој огромен проект
Проф. д-р Петровска-Цветковска: Да, ќе посветиме посебно голем дел од третиот ден на младите невролози и истражувачи, за прв пат досега, од едноставна причина, а тоа е што вредат, заслужуваат и се наша иднина. Јас верувам во идните генерации доктори, кои ветуваат многу.
Зарем може докторската работа да тече без сестринската поткрепа? Нема реализација и ефикасност во работата без медицинската сестра! Нашата клиника е богата со високо едуцирани сестри и професионалци, кои како и во минатото, така и сега ќе бидат дел од научната програма на Конгресот.
Ви посакувам успешен Конгрес, а за крај би Ве замолила доколку имате некаква порака да ја споделите…
Проф. д-р Петровска-Цветковска: Искрено жалам што ќе изостане онаа топла атмосфера на дружба, непосредни контакти и пријателски разговори, но верувам дека и во ваква (засега единствено достапна онлајн форма), Конгресот ќе вроди со огромен плод. Целта ни е да ги пренесеме новите работи, да ги повториме старите, да размениме искуства и секако да иницираме нови стручни состаноци и настани кои ќе не направат побогати со знаење од областа на неврологија.
