♦♦♦♦♦♦♦
Водечкиот лекар од болницата „Guy’s and St Thomas’s“ кој помогна да се спаси животот на британскиот премиер Борис Џонсон, вели дека коронавирусот е „полио на оваа генерација“ и предупреди дека ќе има долгорочни последици врз пациентите.
Професорот Николас Харт, експерт за рехабилитација и вентилација, објави твит: „Ковид-19 е полио (детска парализа) на оваа генерација. Пациентите имаат лесна, умерена и тешка болест. Голем број на пациенти ќе имаат физичка, когнитивна и психолошка попреченост после критичната болест што ќе бара долгорочно справување. Мора да планираме однапред.“
На 22 март, еден ден пред Обединетото Кралство да се „затвори“, професорот Харт објави: „Барање за помош. Јас работам 18 часа на ден, како и многу други за да се осигураме дека можеме да ги заштитиме сите наши пациенти и целиот наш прекрасен NHS тим. Коронавирусот е сериозна болест и сакам сите да се грижат и да останат безбедни, а тоа бара од вас да останете дома“.
Премиерот на Велика Британија, Борис Џонсон истакна дека професорот Николас Харт и консултантот д-р Ник Прајс му помогнале да го надмине вирусот. Откако Џонсон по нив му го даде средното име Николас на својот новороден син, докторите изјавија дека се „почестени што им е оддадено признание на ваков начин“.
Полио е вирусна болест која може да предизвика парализа и смрт. Иако глобално е речиси искоренета, сепак, се уште се среќава во Азија и Африка. (Дејли мејл)
