Психолозите повикуваат удирањето на децата во домот да биде забрането со закон поради влијанието кое може да го има на детското ментално здравје. Предлогот, претставен на Trades Union Congres во Велика Британија, од Здружението на образовни психолози, ја повикува владата да „признае дека телесната казна може да има негативни долгорочни последици за развојот на детето„.
Родителите во Велика Британија имаат законска дозвола децата лесно да ги удрат, што е опишано како „разумна казна„.
Меѓутоа, психолозите кои ја поддржуваат оваа забрана, тврдат дека удирањето никогаш не е ефикасен начин за дисциплинирање на детето, без оглед на околностите. Добротворната организација Save the Children наведува дека сите деца имаат „право на заштита од насилство, искористување, злоставување и занемарување„, а чинот удирање го опишува како „злоставување на децата„.
Колку повеќе детето е телесно казнувано заради дисциплина, толку е поверојатно дека ќе израсне во антисоцијален и агресивен човек, открило истражување објавено во списанието Journal of Family Psychology. Биле проучувани разни студии во период од 50 години, кои вклучувале повеќе од 160.000 деца.
„Утврдивме дека тепањето е поврзано со несакани штетни последици и не е поврзано со непосредна или долгорочна усогласеност„, изјавила д-р Елизабет Гершоф, главна авторка на студијата.
Гершоф изјавила дека луѓето имаат мислење дека удирањето по газето и физичкото злоставување се две различни работи. Сепак, истражувањата покажуваат дека удирањето е поврзано со истите негативни последици кај децата, како и злоставувањето, само во послаба форма. Гершоф порачува дека можеби е време сите да сфатиме дека тоа не е прифатлив облик на дисциплина, туку злоставување.
