Прекумерното создавање на плунка во устата е еден од непријатните симптоми на бременоста што го доживуваат некои мајки. Почеста е кај трудниците кои се борат со утрински мачнини. Лекарите зборуваат за овој необичен симптом и даваат неколку совети како да си олесните.
Безопасна појава
Пообилното создавање плунка главно се случува во раната бременост, во првото тромесечје. Иако станува збор за непријатна појава, постои причина зошто тоа се случува. Стручњаците сметаат дека на овој начин телото ја штити нашата уста, заби и грло од зголемената желудочна киселина која се јавува кај некои бремени жени.
Бременоста го засилува желудочниот рефлукс, па дури и кога немате мачнина, плунката може да си ја заврши работата и да ја смири киселата содржина. За трудниците кои се борат со мачнини, чувството на плунка во устата може дополнително да ја зголеми непријатноста и да ги натера да повраќаат. Иако се работи за безопасна појава, не постои некој конкретен лек за намалување на плунката.
Како да се олесните?
Обидете се да си олесните со шмукање на коцка мраз или гаргарање со природен раствор за плакнење уста. Ако мирисот на нане не ви предизвикува повраќање, мијте ги забите со пасти со екстракт од нане и редовно одржувајте ја хигиената на усната шуплина.
Можете да се обидете и со џвакање на гуми за џвакање или консумирање на покисела храна како лимони и кисели овошни сокови, доколку не ви предизвикуваат гадење. Секогаш имајте марамчиња при рака за да можете да го исплукате вишокот плунка, во ситуации кога не можете да одите во тоалет. Обидете се да не плукате постојано за да не го нарушите балансот на електролитите во телото.
