Потребно:
- 1 кг замрзната риба ослиќ
- 3 лажици пченкарно брашно
- 3 лажици бело брашно
- 1 лажичка оригано
- 1 лажичка мелен црвен пипер
- Сол
- Црн пипер
- Лук во гранули (може да користите и свеж, ситно сечкан или пропасиран)
За маринада:
- 1 лажица лук во гранули
- 6 лажици маслиново масло
- 1 лажица ситно сечкан свеж магдонос
- 1 лажица вински оцет
- Сол
Подготовка: Одмрзнете ја рибата, па исечете ја на прст дебели котлети. Краевите може да ги оставите и цели. Во чинија измешајте ги двата вида на брашно, ориганото, мелениот црвен пипер, солта, биберот и лукот во гранули. Секое парче валкајте го во подготвената мешавина и редете ги на тавче обложено со хартија за печење. Кога сте ги наредиле сите парчиња, одозгора секое накапете го со сончогледово масло и ставете да се пече на 190 степени, околу 15 минути, а потоа извадете го тавчето, свртете го секое парче убаво да порумени и од другата страна, и вратете во рерна на уште 15 минути. Додека ослиќот се пече, подгответе ја маринадата. Измешајте го лукот, маслиновото масло, магдоносот, винскиот оцет и солта. Испечената риба извадете ја во тенџере (кое има капак), наредете прв ред, па прелијте со маринада, потоа втор ред риба, па повторно маринада и поклопете. Оставете малку да отстои, рибата убаво да впие. Рибата ќе биде фантастично мека и сочна. Добар апетит!
