Тадеус Даниел Пирс е роден на 26 јули во американската држава Охајо, а она што го прави посебен е фактот што потекнува од ембрион замрзнат пред повеќе од триесет години – уште во 1994 година, пред неговите сегашни родители, Линдзи и Тим Пирс, дури и да започнат основно училиште.
„Немавме намера да срушиме никаков рекорд. Само сакавме да имаме дете“, изјави Линдзи, додавајќи дека Тадеус сега има триесетгодишна „сестра“. Претходниот рекорд го држеа близнаци родени во Орегон во 2022 година, исто така од 30-годишен ембрион.
Ембрионот на Тадеус бил создаден за време на процедурата за ин витро фертилизација во деведесеттите години за Линда Арчер и нејзиниот сопруг во тоа време, кои се бореле со неплодност. Од четирите создадени ембриони, еден бил искористен за бременост што резултирала со раѓање на девојче – денес триесетгодишна жена и мајка на десетгодишно девојче. Останатите три ембриони останале замрзнати.
„Секогаш многу сакав уште едно дете. Ги нарекував „моите три мали надежи““, изјави денес 62-годишната Линда Арчер.
Се проценува дека милиони, а можеби и десетици милиони ембриони моментално се наоѓаат во замрзнувачи низ целиот свет бидејќи биле вишок за време на процедурите за ин витро фертилизација, кои обично произведуваат повеќе ембриони отколку што можат да се имплантираат.
По разводот, на Арчер ѝ било дадено старателство над ембрионите. Неколку години подоцна, таа дознала за можноста за донација преку „посвојување на ембриони“ – форма на донација што често ја организираат христијанските агенции во САД. Таа се согласила да ги даде преостанатите ембриони на посвојување, и тие се вклучени во програмата „тешко посвојливи ембриони“, што обично значи дека се складирани долго време или се смета дека е малку веројатно да резултираат со успешна бременост.
Линдзи и Тим, кои сега имаат 35 и 34 години, се приклучиле на истата програма откако седум години безуспешно се обидувале да зачнат.
„Имавме тешко породување, но сега двајцата сме добро. Тадеус е мирно бебе. Воодушевени сме што го имаме“, рече мајката Линдзи.
Целото искуство било длабоко емотивно за неа. „Сето тоа е малку надреално. Тешко е да се поверува дека се случи“, вели таа.
Клиниката за плодност каде што бил имплантиран ембрионот ја води д-р Џон Гордон, специјалист по репродуктивна ендокринологија, кој се залага за намалување на бројот на складирани ембриони. Гордон, вели: „Ние сме водени од принципите на верата. Секој ембрион заслужува шанса да живее. Единствениот ембрион што сигурно нема да стане дете е оној на кој не му е дадена шанса да биде префрлен во матката.“
Патем, првото дете зачнато со ин витро оплодување, Луиз Браун, е родено во 1978 година во Велика Британија, што воведе нова ера на репродуктивната медицина што им овозможи на милиони парови да станат родители.
