Сечењето на папочната врвца е важен дел од породувањето. Тоа е последниот чекор во преминот на вашето бебе од удобен живот во матката во нов живот и има се повеќе докази дека одложувањето на сечењето на папочната врвца може да биде од голема корист за вашето бебе, дури и ако го одложите за само неколку минути.
Што е папочна врвца?
Се формира околу петтата недела од бременоста и на крајот достигнува должина до 2 метри, преку која вашето бебе добива крв богата со хранливи материи и кислород и испраќа јаглеродиоксид и отпадни материи назад во вашето тело, од каде потоа се елиминираат.
Папочната врвца се протега од централна точка во стомакот на бебето до постелката, која управува со протокот на молекули и крвни клетки во двете насоки. Сè додека папочната врвца е врзана за бебето, а постелката или плацентата е недопрена, оваа важна размена продолжува.
Колку долго да се чека пред да се исече папочната врвца?
Сечењето на папочната врвца била една од првите работи што се правела штом се роди бебето. Било вагинално или со царски рез, тоа се изведувало во рок од 15 до 20 секунди по раѓањето.
Но, сега Светската здравствена организација (СЗО) препорача одложување на сечењето на папочната врвца за повеќето доносени и предвремено родени бебиња, без разлика дали се родени вагинално или со царски рез, од една до три минути по раѓањето.
Кои се предностите на одложеното сечење папочната врвца?
На почетокот на 2000-тите, истражувачите кои ги проучувале предвремено родените бебиња сфатиле дека оставањето на папочната врвца на место 45 секунди, наместо вообичаените 15 или 20, ја намалува можноста овие мали бебиња подоцна да имаат потреба од трансфузија на крв. Всушност, секоја секунда или минута во која папочната врвца останува прицврстена е дополнително време за испорака на мајчината крв во телото на детето.
Во 2013 година, со преглед на овие студии е откриено дека новороденчињата на кои им била пресечена папочната врвца по повеќе од една минута по раѓањето, имале повисоки нивоа на хемоглобин и железо, молекули потребни за квалитетен напредок на детето.
Се покажало дека бебињата од групата на кои подоцна им била пресечена папочната врвца имале помал ризик од недостаток на железо или анемија.
Други студии откриле дека со одложувањето на сечењето на папочната врвца е намалено нивото на разни воспаленија кај бебињата, а студија од 2015 година покажала дека децата, особено момчињата, чии врвци подоцна биле исечени, имале подобри моторни и социјални вештини на 4-годишна возраст.
Кои се ризиците од одложеното сечење на папочната врвца?
За среќа, нема многу ризици од одложеното сечење на папочната врвца. Но, може да дојде до благо зголемување на случаи на жолтица, состојба предизвикана од прекумерно ниво на билирубин. Решението за жолтица во овој случај би било фототерапија, изложување на бебето на светлина.
Но, не секој ќе може да го одложи сечењето на папочната врвца на бебето. Крварење кај мајката, проблеми со плацентата или крварење поврзано со абрупција на постелката или плацента превиа се некои од компликациите што може да го исклучат одложеното сечење на врвката. И ако папочната врвца на вашето бебе е заплеткана или почне да излегува пред бебето, лекарите ќе треба веднаш да ја пресечат.
Исто така, ако бебето има проблеми со дишењето, важно е веднаш да се исече папочната врвца за да може бебето да ја добие сета помош што му е потребна.
