Неодамнешно истражување покажува дека семејните одмори се многу неопходни. Тие ги прават нашите деца, но и нас – посреќни и градат посилни врски и спомени.
Тој голем подарок на искуство, како што е семеен одмор, е докажано дека е просоцијален подарок за поврзување – поголем од кој било материјален имот, стои во истражувањето спроведено на Универзитетот во Торонто.
„Искуствениот подарок предизвикува емоционална реакција кога примачот го консумира, како што е возбуда од адреналинска авантура, возбуда на концерт или спокојството на благосостојбата и е многу поинтензивно емотивен од кое било материјално поседување“, вели авторката на истражувањето Синди Чан и додава дека искуството, особено семејното искуство е најголемиот подарок за поврзување.
Не само што искуството на семејниот одмор нè зближува со нашите деца, туку и го прави целото семејство посреќно долго откако ќе заврши одморот. Истражувањето открило дека половина од испитаниците ги истакнале семејните одмори како омилен спомен од детството, а другата половина нагласила дека семејните одмори им овозможиле среќни спомени кои засекогаш ќе останат во нивното сеќавање.
Џон Мекдоналд, директор на „Family Holiday Association“, добротворна организација која овозможува одмор за семејства со ниски приходи, тврди дека семејниот одмор е како засолниште на среќата. „Кога семејствата се соочуваат со тешки животни ситуации, таквите спомени можат да бидат многу моќни, а ако имаме ли такви спомени – можеме да им пристапиме на проблемите од сосема поинаква и попозитивна перспектива“, вели тој.
Семејните одмори можат да бидат како „засилувач“ за мозокот на децата, со оглед на тоа што им обезбедува нова и збогатена средина. „Таа „збогатена“ средина овозможува нови искуства кои се многу важни за социјална, физичка, когнитивна и сензорна интеракција“, објаснува д-р Маргот Сандерленд, детски психотерапевт.
„Ако избирате помеѓу да купите таблет или некоја друга материјална работа на вашето дете и да го однесете на семеен одмор, земете го предвид моќното влијание врз поврзувањето и развојот што го овозможуваат таквите одмори. Таквите спомени не можат да се споредат со никакво материјално поседување“,додава психотерапевтот.
Покрај тоа, играњето на плажа, планинарењето или кампувањето го активира мозокот на начин што ослободува окситоцин и допамин. “Тие го намалуваат стресот и го активираат чувството на топлина, како и оптимизмот. На овој начин, семејствата всушност емоционално ги полнат батериите”, објаснува д-р Сандерленд.
Запомнете, не треба да патувате далеку за да уживате во придобивките од семејниот одмор. Без разлика дали планирате брзо патување на езеро или неколку дена на море – резултатите се исти: Посреќно и поповрзано семејство – а тоа се бесценети вредности.
