Растењето без доволно љубов и емоционална поддршка од мајка може да има долгорочни последици врз психолошкиот развој. Недостатокот на мајчинско внимание може да доведе до проблеми со емоционалната регулација, самодовербата и способноста за градење здрави односи. Во потешки случаи, ова може да резултира со емоционално запоставување во детството, што подоцна влијае на различни аспекти од животот. Советникот и терапевт Микеле Молитор истакнува неколку навики кои може да укажуваат на недостаток на мајчинска љубов во детството.
Имате потешкотии да ги регулирате емоциите
“Вниманието на мајката игра клучна улога во развојот на емоционалната стабилност. Ако сте пораснале без него, можеби сте развиле потешкотии во препознавањето и изразувањето на емоциите, што може да доведе до нагли промени во расположението, претерани реакции на стрес и проблеми во односите со другите”, истакнува Молитор.
Често се чувствувате исклучени
Растењето со чувство на исклученост од мајката може да создаде длабоко чувство на неприпадност, кое подоцна може да се пренесе и во други области од животот. „Може да се чувствувате несигурни во социјалните ситуации и да се плашите од отфрлање, што може да го отежне градењето блиски односи“, објаснува советникот.
Имате негативен став кон речиси сè
Ако мајката често била критична, песимистичка или емотивно дистанцирана, можно е личноста да усвои негативен начин на размислување. Молитор вели: „Ова може да значи склоност кон песимизам, прекумерна самокритичност и тешкотии во препознавањето на позитивните аспекти од својот живот“.
Си поставувате неверојатно високи стандарди за себе
“Растењето со мајка која имала нереално високи очекувања можело да доведе до тоа да постојано да се стремите кон перфекционизам. Можеби се чувствувате како никогаш да не сте доволно добри или дека вашите успеси не се достојни за признание, што може да предизвика стрес и исцрпеност”, забележува советникот.
Тешко ви е да кажете „не“
Ако нашата мајка била личност која ги задоволува другите, можно е и ние да прифатиме сличен модел на однесување. „Ова може да значи дека имате потешкотии да поставувате граници, се чувствувате виновни кога одбивате туѓи барања и постојано се трудите да ги исполните очекувањата на другите, дури и на ваша штета“, вели Молитор.
Тешко донесувате одлуки
Растењето со мајка која премногу контролира може да ја ограничи способноста за донесување независни одлуки.
„Често може да се сомневате во вашите избори, да го преиспитувате секој чекор и да се плашите од грешки, што може да го отежне секојдневниот живот и донесувањето важни одлуки. Сепак, можете да ги промените вашите негативни верувања и навики и да ги замените со оние кои носат повеќе среќа, самодоверба и внатрешен мир, а со тоа да ги прекинете семејните циклуси на траума“, заклучува советникот.
