Додека некои родители се трудат децата да ги запишат на сто и една воннаставна активност, ги притискаат да имаат најдобри оценки, цело време мислејќи дека тоа ќе им обезбеди успех во животот.
Меѓутоа, истражување на Американското здружение за психологија покажало дека личноста на детето е многу подобар индикатор за идниот успех. Во таа насока, експертите навеле шест особини кои треба да ги има секое дете, нагласувајќи дека добрите оценки воопшто не се пресудни за добра иднина.
- Емоционална отпорност
Добро е децата да се потрудат малку повеќе за добри оценки бидејќи тоа им дава одлучност, а оние деца кои постојано слушаат колку се паметни и генијални обично во одреден момент имаат проблеми со училиштето бидејќи штом малку негде им „зачкрипи“, тие се откажуваат.
Емоционално отпорните деца сакаат да учат и не се грижат ако на почетокот не разбираат сè, туку продолжуваат да се трудат. Затоа е важно родителите да го пофалат детето за трудот, а не за исходот, за она што детето го научило, наместо за оценката што ја добило.
- Интелектуална љубопитност
Децата кои сакаат да учат, се од непроценлива вредност за идните работодавци бидејќи размислуваат надвор од рамката. Тие и на учењето гледаат од некоја нова перспектива. Она што е важно да се нагласи е дека овој начин на размислување обично не се учи од книги, туку преку искуство, односно обиди и грешки.
- Отворен ум
Децата од мали нозе треба да се учат дека човекот цел живот учи нешто ново. За нив е важно да знаат дека никој не ги знае одговорите на сите прашања бидејќи секогаш има толку многу што треба да се научи.
За децата да пораснат во слободоумни луѓе, добро е да имате некои семејни разговори и дискусии без никакво осудување, каде што се поттикнуваат и прифаќаат различни мислења.
- Љубезност
Децата уште од мали нозе треба да знаат дека секој од нас е подеднакво важен и дека е важно секогаш да бидеме љубезни со сите и да помагаме кога можат. Пофалете го вашето дете кога прави нешто убаво за другите и бидете му пример за такво однесување.
- Самодисциплина
Смиреноста и доследноста секогаш победуваат. Истражувањето на психолозите покажало дека „напорната работа и дисциплината придонесуваат многу повеќе за успехот на училиште отколку коефициентот на интелигенција“. Од овие студии извлечен е заклучок дека доследниот труд кој води до постепен напредок во нешто, има многу подобар ефект од „бубањето“ за тест во последен момент и всушност ја намалува потребата за многу учење.
Затоа е добро да се охрабруваат децата секојдневно да учат по малку, со паузи и на тој начин да ја градат својата самодисциплина.
- Самодоверба
На интервјуата за работа, меѓу другото, проверуваат дали личноста може да работи сама и во тим, дали има самодоверба да се соочи со предизвикувачки ситуации и дали знае и сака да учи.
Затоа е добро децата да научат уште од мали нозе да застанат за себе пред наставниците и другите авторитети. Секако, сето ова не значи дека училиштето и оценките се неважни, туку дека е важно и децата да научат како да учат и да се развиваат социјално.
