Уште во 2007 година, Холандија за прв пат беше наведена како најдобар пример за просперитет во детството. Во 2013 година беше објавен извештај на УНИЦЕФ кој ги прогласи холандските деца за најсреќни во светот. Оттогаш, Холандија секогаш е на самиот врв, заедно со Данска и Норвешка. Неколку други организации, вклучувајќи ги Child Poverty Action Group и World Economic Forum, исто така ги рангираа холандските деца неверојатно високо по прашање на личната среќа.
Како точно холандските родители ги воспитуваат најсреќните деца на светот? Постојат шест правила до кои доследно се придржуваат.
Бебињата спијат доволно
Студијата објавена во European Journal of Developmental Psychology ги испитувала разликите помеѓу американските и холандските бебиња.
„Холандските бебиња се смеат и сакаат да се галат повеќе од нивните американски врсници“, заклучијле истражувачите во 2013 година.
Според студијата, релативно мирното однесување на холандските доенчиња делумно се должи на регулираниот распоред на спиење и активности со помал интензитет. Познато е дека американските родители ја нагласуваат важноста на стимулацијата, изложувајќи ги своите деца на широк спектар на нови искуства.
Од друга страна, холандските родители се фокусираат на секојдневните активности во домот. Многу посветуваат внимание на одморот и не се согласуваат на компромиси кога е во прашање спиењето. Тие сметаат дека добро наспиените бебиња овозможуваат добро наспиени родители. Истражувањата покажале дека Холанѓаните спијат во просек повеќе од кој било друг во светот – вкупно осум часа и 12 минути секоја вечер.
Децата поминуваат повеќе време со двајцата родители
Во 1996 година, холандската влада им додели на вработените со скратено работно време исти права како и на вработените со полно работно време, придонесувајќи за подобра рамнотежа помеѓу работата и приватниот живот. Културата за работа со скратено работно време е уште една причина зошто сите овде се толку посреќни. Со 29-часовна работна недела, Холандија ја има најкратката работна недела во светот, според студијата на ОЕЦД од 2018 година.
Речиси половина од возрасната холандска популација работи со скратено работно време, при што 26,8% од мажите работат помалку од 36 часа неделно, а 75% од жените работат со скратено работно време – и тоа во сите сектори, од неквалификувани работници до професионалци.
Како и жените, така и мажите во Холандија својата работа ја извршуваат во четири дена. Ова им овозможува да посветат барем еден ден во неделата на време со своите деца. Ова слободно време често се нарекува „Papadag“, што значи „Ден за татковци“.
Децата чувствуваат помал притисок да бидат подобри во училиште
Во Холандија не е сè во високите оценки, елитните училишта и факултети. На образованието се гледа како на пат кон благосостојбата и личниот развој на детето.
Во Холандија, не ви требаат посебни оценки за упис на повеќето програми за високо образование – сè што ви треба е да ги положите вашите средношколски испити.
“Училиштата овде вложуваат повеќе енергија во мотивацијата отколку во постигнувањата. Успехот е она на што се фокусираат француските и англиските училишта, но нашето истражување покажа дека социјалните вештини се клучни за среќата. Тие се многу поважни од нечиј коефициент на интелигенција”, вели Рут Веенховен, професор по среќа на Универзитетот Еразмус во Ротердам.
Децата се поттикнуваат да го изразат своето мислење
Секој во семејството, вклучувајќи ги и најмладите, имаат свое мислење. Родителството основано на преговори може да биде исцрпувачко бидејќи го тестира нашето трпение. Но, кога ќе му дозволите на вашето дете да преговара, вие го учите како да си постави сопствени граници. Тоа е вештина која ќе му користи на секој кога ќе порасне.
Децата за појадок јадат “hagelslag“
Чоколадо за добро утро? Холанѓаните велат да. Во оваа земја, се појадува hagelslag или чоколаден посип, но зад тоа постои подлабоко значење.
Семејното седење на маса особено пред почетокот на денот, е рутина што во суштина го дефинира холандскиот семеен живот. Семејството не почнува да јаде додека сите, вклучително и децата, не се на маса. Тоа е знак на почит.
Според последниот извештај на УНИЦЕФ, 85% од холандските деца на возраст меѓу 11 и 15 години изјавиле дека појадуваат со семејството секој ден. Јадењето појадок со семејството е поврзано со подобар успех во училиште и намалени проблеми во однесувањето, а истражувањата исто така покажале дека поттикнува семејно поврзување и здрав развој на идентитетот.
Децата се поттикнуваат да возат велосипеди
Холанѓаните не се љубители на автомобили. Благодарение на рамниот терен и мрежата на велосипедски патеки, возењето велосипед е најпрактичниот и најефикасен начин за патување. Дури и кога врне или дува ветар, родителите се облекуваат себеси и нивните деца во топла, водоотпорна облека и чизми и се качуваат на своите велосипеди.
