Шарлахот (скарлатина) е всушност ангина проследена со осип на кожата. Причина за појава се бактериите на стрептокока група А (бета хемолитички стрептокок) кои создаваат една супстанца (токсин) кој предизвикува осип.
Како се заразува детето
Едноставно – стрептококите се шират во колективите неверојатно брзо. Со валкани раце, но и директен контакт на заболено дете со здраво.
Колку трае инкубацијата
Инкубацијата (времето кое поминува од влезот на бактеријата во грлото до појавата на први симптоми) е кратка, најчесто е доволно два-три дена болеста да се манифестира.
Како да се посомневате на шарлах
Лесно – детето ги има сите симптоми и знаци на гнојна ангина: силна болка во грлото, висока температура, “се го боли“, а и кога ќе падне температурата не се чувствува подобро. Брзо се јавува “ситно-зрнест“ црвенкаст оспи по телото, кој некогаш може да се јави и пред силната болка. Проблем претставува што постојат и други вируси кои даваат исти симптоми.
Како се поставува дијагноза
Кај поголем број од децата, педијатарот многу лесно ја поставува дијагнозата по прегледот: се воочуваат гнојни чепови во грлото и карактеристичен осип. Ретко се потребни дополнителни анализи (брис од грлото или крвна слика) и тоа кај деца кои немаат типична форма на болеста, или ако постои сомнение за вирусна инфекција.
