Јужна Кореја денеска објави дека најмалку 116 лица, кои биле излекувани од коронавирус се повторно позитивни на тестот за Ковид-19, иако официјалните лица навестија дека наскоро ќе размислат за ублажување на ограничувањата кои имаа цел спречување на нов бран на инфекција.
Јужна Кореја денеска пријави само 25 нови случаи на заразени, но порастот на „реактивираните“ пациенти ја зголемува загриженоста додека земјата се обидува да ја искорени инфекцијата.
- Официјалните лица сè уште ја испитуваат причината за моменталниот рецидив. Сепак, директорот на Корејскиот центар за контрола и превенција на болести (KCDC) Jеонг Еун-кјонг рече дека вирусот можеби повторно се активирал, а не дека пациентите се повторно заразени.
Други експерти истакнаа дека можеби се работи за неисправни тестови или дека во организмот на пациентите се присутни остатоци од вирусот кои веќе не се заразни ниту опасни, ни за нив ни за другите.
Сепак, овие 116 случаи се повеќе од двојно од 51 случаи кои земјата ги пријави во претходната недела.
Во меѓувреме властите ги повикаа Јужнокорејците да продолжат строго да се придржуваат до упатствата и ограничувањата за јавните собири, но навестија дека таквите мерки наскоро би можеле да бидат ублажени.
