За настан што го менува животот, како што е донесувањето на бебе на свет, информациите и поддршката од околината се клучни. Сепак, кога станува збор за породување, постои воздржаност во споделувањето информации. Сè уште постојат одредени работи што се случуваат за време на породувањето, кои не им се познати на многумина – оние работи што ги тераат жените да велат „Немав поим“ или „никој не ми кажа за тоа“ по породувањето.
Акушерката или народски кажано бабица, Мишеч Лајн зборува за клучните работи што се случуваат за време на породувањето, а кои би можеле да ве изненадат.
Какво е чувството кога ќе пукне водењакот?
„Честопати жените дури и не го чувствуваат тоа, но забележуваат дека се мокри. Некои чувствуваат како нешто да излетало од нив. Но, контракциите не мора да започнат веднаш по пукнувањето на водењакот, што е случај кај некои жени, а кај некои можат да започнат дури и неколку часа подоцна“, објаснува Лајн.
Кога испаѓа слузниот чеп?
Цервикалниот слузен чеп (operculum) е чеп што го исполнува и затвора цервикалниот канал за време на бременоста.
„Слузниот чеп се наоѓа на влезот во цервикалниот канал. Служи како заштита од инфекции за време на бременоста. Неговото испаѓање претходи на пукнувањето на водењакот, но не мора да значи дека едното ќе оди веднаш зад другото. Слузниот чеп може да испадне и денови претходно, дури може и повторно да се формира, но тоа најавува породување“, вели Лајн.
Како изгледаат контракциите?
„Почетокот на породувањето може да личи на менструални болки. Некои жени можат да почувствуваат силно влечење надолу длабоко во матката и нозете. Ако бебето е свртено кон грбот на мајката, тогаш болката е повеќе насочена кон предниот дел од телото. Ако бебето е свртено кон предната страна од телото на мајката, тогаш жената обично ја чувствува болката посилна во грбот. Исто така, контракциите може да се појават на врвот на матката пред жената физички да ги почувствува“, вели акушерката.
Што се случува под епидурална анестезија?
„Бремените жени кои примаат епидурална анестезија обично мора да легнат и нивното движење е ограничено. Можно е да се изгуби чувството во нозете, како и пад на крвниот притисок бидејќи венскиот систем се опушта како одговор на анестетикот. Епидуралната анестезија влијае и на мочниот меур. Жените можат да имаат тешкотии во препознавањето на сигналот за празнење на мочниот меур, па затоа треба да се потсетат на ова. Ако не можат сами да го сторат тоа, мора да се вметне катетер“, објаснува Лајн, додавајќи дека понекогаш епидуралната анестезија може да делува само делумно, а понекогаш воопшто не делува.
Што е со раната по породувањето?
„Околу 85 проценти од жените кои се породиле вагинално доживеале некаков вид перинеална траума. Станува збор за оштетување на вагиналната кожа што се јавува поради спонтано пукање на перинеумот, епизиотомија или поради конци. Колку е поголема раната, толку подолго ќе биде потребно за да заздрави. Потребно е вагиналниот дел да се исплакнува со обична вода по секое мокрење, да се исуши и често да се менуваат влошките“, советува Лајн.
