Воведувањето на храна кај бебето е една од најстресните состојби на мајките. Периодот пред да се започне со цврст оброк, мајките се бомбардираат со информации кога и како да започнат со првиот оброк и која намирница да биде прв избор. Најголемиот страв е дали бебето ќе ја прифати храната, дали ќе знае да ја голтне, како да знаат кога е вистинското време за хранење и уште многу други дилеми. Главниот проблем е што хранењето станува главна преокупација на мајката, па оттаму и целиот процес на хранење станува стресна состојба.
- Детето да јаде кога јадете и вие
Научете го детето да јаде кога јадете и вие. Децата учат по принцип на повторување. Седнете го детето заедно со вас на семејната маса и јадете истовремено. Тоа ќе ве гледа како вие го држите приборот, какви навики имате за време на оброкот и што јадете. Вклучете го во секој ваш оброк.
- Секогаш да јаде во седната положба
Научете го детето да седи додека јаде, најпрво во хранилка додека е мало, а потоа на столче заедно со вас. Хранењето додека стои или додека е во движење е лоша навика. Со тоа ќе избегнете да трчате по него во обид да го исхраните.
- Хранењето е нова вештина за детето
Воведувањето на оброк е ново нешто за детето. Исто како и одењето и зборувањето, хранењето е нова вештина за која му е потребно повеќе време за да ја усоврши. Секој нов вкус е ново искуство за детето. Затоа, бидете трпеливи во овој процес. Најважно е да не почнете веднаш со премногу солена или блага храна, бидејќи детето ќе ги одбива сите други вкусови очекувајќи тие да бидат солени или благи.
- Бидете трпеливи
Пробајте со една-две лажички, ако детето е заинтересирано, продолжете. Доколку одбива, прекинете, па пробајте повторно по извесно време. Истото се однесува и за типот на храна, доколку некој вкус не му се допаѓа, пробајте со друга храна.
- Оставете го детето да ужива во хранењето
Дајте му ја лажичката во раце, нека ја види и игра со неа. Оставете го и да се извалка. Пуштете го да ја искуси храната со сите негови сетила. Преку храната, го спознава и светот. Извалкана облека, хранилка, извалкан под, колку и да звучи непријатно, на овој начин вашето дете учи како да јаде.
