Идните мајки сакаат да го допираат и галат својот труднички стомак. На овој начин тие се поврзуваат со бебето и комуницираат со него уште од најраните денови. Но, дали бебето чувствува дека трудниците го допираат и галат нивниот стомак?
Дури и пред бебињата да го развијат сетилото за вид и слух во утробата, тие можат да почувствуваат допир. Бебињата близнаци ќе комуницираат редовно во вториот триместар од бременоста така што ќе се допираат едни со други.
Додека го галите стомакот во последниот триместар од бременоста, можете да дознаете и во каква положба е бебето. Може да почувствувате стомакот на бебето (мек, тркалезен), главата (тврда, кружна) и екстремитетите со кои ве удира од страна. Кога ќе почнете да ги чувствувате ударите и движењата на вашето бебе во стомакот, што е обично помеѓу 18 и 22 недела, вашето бебе може да ве почувствува и вас.
Како реагира бебето кога мама го гали стомакот?
Експертите кои истражувале како бебињата во матката реагираат на надворешните дразби, тврдат дека доживуваат задоволство кога мама го гали и допира нејзиниот труднички стомак. Истражувањето го правале со сонограм на бремени жени во текот на вториот и третиот триместар за да ги следат движењата на бебето додека нивните мајки зборуваат, ги галат нивните стомаци или лежат целосно мирни.
Тие дошле до резултат дека бебињата повеќе ги движат рацете, главата и устата кога мајките го допираат нивниот стомак отколку кога зборуваат, а на допирот на мајката реагирале веќе помеѓу 21 и 25 недела од бременоста.
