Американската агенција за храна и лекови (ФДА) може да издаде дозвола за итна употреба на вакцина против коронавирус (EUA) за неколку недели, откако вакцината ќе ги исполни барањата за ефикасност, изјави д-р Питер Маркс, директорот на ФДА Центарот за биолошки истражувања, кој ги одобрува вакцините, пренесува Си-ен-ен.
„Ние сме подготвени да издадеме дозвола за итна употреба на вакцината во соодветно опкружување“, изјави д-р Маркс за време на Самитот за контрола и превенција на болести и додаде дека вниманието кое Агенцијата го посветува на испитувањата на вакцините против коронавирус треба да го забрза процесот на одобрување за итна употреба на вакцината којашто ќе се покаже ефикасна во клиничкото испитување.
„Кога тоа ќе се случи, потребно е да поминат неколку недели пред да можеме да ја одобриме вакцината за итна употреба“, рече лекарот, додавајќи дека се надева оти итната употреба на вакцината ќе се примени на релативно широка популација.
„Дозволата за итна употреба ќе биде за населението за кое имаме соодветни податоци“, рече д-р Маркс.
Тој нагласи дека во трката за вакцина нема да биде „жртвувана“ безбедноста.
„Првите вакцини што се појавуваат може да бидат во малку понеповолна положба во однос на оние кои ќе дојдат подоцна“, рече лекарот. „Мислам дека е навистина прекрасно тоа што луѓето имаат желба за што побрз напредок, но сите знаеме дека во реалниот живот обично не оди онака како што посакуваме“, изјави Маркс.
