Според студијата, три четвртини од испитаниците имале барем еден од следниве симптоми дури шест месеци по акутната фаза на болеста
Медицинското списание „Лансет“ ги објави збирните резултати од студиите за последиците од коронавирусот, а во текстот се наведени и симптомите што ги чувствуваат луѓето излекувани од вирусот со недели, па дури и месеци подоцна.
„Лансет“ наведува вкупно девет симптоми кај испитаници кои имале средно тешка и тешка клиничка слика, а многу од нив биле хоспитализирани. Според студијата, три четвртини од нив имале барем еден од следниве симптоми дури шест месеци по акутната фаза на болеста.
Дури 26 проценти од испитаниците имале проблеми со спиењето, несоница или потешкотии при заспивање, што е сериозен проблем затоа што добриот и редовен сон е еден од клучните начини за опоравување на организмот, а овие долгорочни симптоми го попречуваат и забавуваат закрепнувањето. Понатаму, депресија и анксиозност биле пријавени кај 23 проценти од испитаниците.
„Ова се чести последици на хроничните болести, бидејќи лицето има впечаток дека телото го изневерило, дека не може да предвиди што ќе се случи понатаму, ниту да го препознае сопствениот организам. Тоа предизвикува вознемиреност, слаба концентрација, проблеми со спиењето, кошмари и грижи. Болеста честопати нè изолира и од нашиот систем за поддршка, па затоа сами се справуваме со овие чувства. Анксиозноста во тешки форми може исто така да доведе и до напади на паника“, вели Теса Милер, авторка на книката „Она што нема да те убие“.
Девет проценти од испитаниците пријавиле болки во зглобовите, што е честа појава кај воспалителните процеси во телото.
„Воспалението го напаѓа ткивото на зглобовите, предизвикувајќи отекување, задржување на течностите, оштетување на мускулите и други проблеми“, објаснува ортопедскиот хирург д-р Кристофер Траверс за „Eat This“.
Студијата исто така ги вклучува и претходно познатите симптоми како што се мускулна слабост, брз замор, плитко дишење, губење на чувството за мирис и вкус, како и опаѓање на косата. Меѓутоа, горенаведените три симптоми се издвојуваат како особено интересни бидејќи досега не ги пријавиле многу луѓе.
