Денес речиси и да нема возрасна личност која нема свој омилен пијалак со кофеин. Кафето – слатко или горчливо, турско или инстант, со млеко или без – за многумина е нешто без чиј силен, примамлив мирис не можат да го замислат почетокот на новиот ден.
Додека вие уживате во него, можеби и по неколку пати на ден, сосема е можно тоа да го разбуди интересот и кај вашето дете.
Што е тоа што мама и тато толку го сакаат и што така убаво мириса? Многу родители ќе му дозволат на детето да проба малку кафе, надевајќи се дека вкусот ќе му биде одбивен. Други ќе се згрозат од самата помисла, а трети ќе се насмеат ако детето задоволно се оближе.
Но, дали малите деца воопшто смеат да пијат кафе – во каква било количина? Од една голтка сигурно нема да им се случи ништо сериозно, но пијалаците со кофеин можат да имаат негативни последици за нивниот организам. И покрај тоа, многу истражувања покажуваат дека околу 15 проценти од децата на возраст од две до пет години секојдневно консумираат некој пијалак со кофеин, а меѓу нив и барем малку кафе.
Но, колку е безбедно, или да кажеме „паметно“, децата да пијат кафе?
Постојат култури во кои е речиси нормално децата да присуствуваат на ритуалот на пиење кафе, како што е случај во некои хиспано заедници. Таму, за време на попладневната кафе-пауза, сосема е вообичаено и децата да уживаат во него.
Истражувањата покажуваат и дека, по неколку „пробувања“ кафе, девојчињата – без разлика на возраста – полесно се навикнуваат на кафето од момчињата и имаат поголема тенденција да го пијат или да го бараат секојдневно. Тука е и факторот на достапност и имитирање: децата сакаат да пробаат сè што гледаат често. Тие сакаат да бидат како мама и тато, кои постојано ја држат таа „фамозна“ шолја кафе во рака или ја сркаат од шолјата. Тоа придонесува децата сè порано да почнат со „љубовта кон кафето“.
Сепак, кога станува збор за внес на кофеин, децата најчесто го внесуваат преку енергетски пијалаци, потоа преку кафе, а потоа и преку чај, кој некои деца почнуваат да го консумираат уште од втората година. Лекарите не дале строги и јасни насоки по ова прашање, но сепак истакнуваат дека кофеинот не е добар за децата. Загриженоста е особено голема поради зголемената консумација на енергетски пијалаци кај децата и младите.
Некои студии покажуваат дека двегодишни деца кои внесуваат кофеино пијалак меѓу оброците (чај, кафе или газиран пијалак) имаат трипати поголем ризик од дебелина уште во градинка.
Стручњаците предупредуваат дека детските тела се мали, како и нивната телесна маса, па штетните ефекти на кофеинот кај нив се посилни и побрзи. Долгорочните последици и влијанието врз развојот на мозокот сè уште не се целосно потврдени, но се можни и не треба да се игнорираат.
Како тогаш да постапите во култура во која кофеинот е еден од омилените состојки на многу пијалаци кои постојано се пред очите на децата? Најдобро е да понудите безбедна алтернатива – млечна пена како за капучино, топло чоколадо, какао или билен чај. Со малку поголемите деца можете и отворено да разговарате за негативните последици по здравјето.
