Мајките често сонуваат за слатки фризури, репчиња и штипки на косата на нивните девојки. Некои мајки веќе прават разни фризури на своите девојчиња околу 6-месечна возраст, додека некои мораат да чекаат до втората година косата да порасне и зајакне. Не треба да се грижите за тоа, бидејќи косичката е како првите заби – непредвидлива и не е страшно ако малку задоцни.
Потребно е да се осврне и на раширената заблуда дека косата ќе зајакне и ќе стане погуста ако детето се ишиша на ќелаво. За жал, тоа не е точно. Оваа заблуда доаѓа од времето кога децата со шишање на косата се заштитувале од болести (на пример, тифус) или на ваков начин се решавал проблемот со вошки. Денес ваквото шишање нема никаква разумна основа и нема да ја зајакне слабата коса, бидејќи шишањето на таа возраст не влијае на густината и цврстината на косата.
Кога опаѓањето на косата е загрижувачко?
Опаѓањето на косата, меѓутоа, може да загрижува. Косата и влакната по телото со кои се раѓа бебето обично опаѓаат природно по неколку месеци. После тоа, на детето му расте вистинска коса, која може да биде сосема поинаква боја од првата коса.
Густите влакна на телото, или лануго, штом ќе испаднат, обично не растат повторно, туку се заменуваат со нежни, ретки и нормални мали влакна кои ќе останат.
Она што може да укаже на проблем кај опаѓањето на косата е недостаток на витамин Д, или можноста за појава на рахитис. Знаците дека детето можеби страда од недостаток на овој витамин не се толку очигледни, но покрај обилно потење на главата, кое се јавува при крајот на хранењето и општото чешање на главата, се манифестира и со губење на косата на задниот дел од главата. Сепак, за ова најдобро е да се консултирате со педијатар, бидејќи ќелавоста на задниот дел од главата може да настане и од лежење и спиење на грб на бебето. Обидете се почесто да ја менувате положбата за спиење на детето на страна и консултирајте се со педијатар.
