Досадата кај децата е нормална појава, иако многумина ја поврзуваат со доаѓањето на 21. век. Порано децата умееле сами да се заиграат и да се забавуваат, а родителите биле подготвени на децата да им го покажат патот до креативно исполнето време.
Факт е дека членовите на семејството повеќе биле свртени едени кон други, се знаело работното време на родителите и времето кое се поминува со децата. Модерна технологија, освен телевизија и радио не постоела. Дали сме добиле или сме изгубиле?
Досадата е составен дел од животот. За возрасните може да претставува пауза, одмор, простор за размислување, креативност, мечтаење. На адолесцентите досадата им носи одмор, но и ризик доколку не можат да ја истолерираат. Тенка е линијата помеѓу депресивноста и досадата кај младите, нагласуваат стручњаците.
Кај децата до три – четири години, нормално е родителите да ги забавуваат децата, со цел да ги научат како сами да си осмислат времето. Задача на родителите е да, во зависност од возраста на детето, неговиот интерес и внимание, заеднилки пронајдат активности со кои детето ќе може самостојно да се заигра. Слободното време исполнете го креативно. Како?
- Вклучете го детето во секојдневните активности, средување на домот, местење а крветот, грижа околу играчките, местење на алиштата. Децата тоа го сакаат бидејќи се чувствуваат како возрасни на кои им укажувате доверба и значење во семејниот живот.
- Одете во парк со децата кога и да можете. Дружењето со други родители и деца и престојот на воздух ќе им годи на сите, Тоа е добра прилика да запознаете и да стекнете нови пријатели, и вие и детето.
- Одењето во детски театар и кино е вистинска радост за децата. После тоа, задолжително разговарајте за ликовите, карактерите, кој е добар, а кој не… Дома помогнете му на детето да проба да нацрта некој инетерсен лик и поттикнете го со свои зборови на некој од домашните да ми раскаже што гледал во кино или во театар.
- Напишете ги можните активности на хартија. Напишаните зборови, дури и ако детето не знае да чита, имаат многу сериозна тежина од кажаните. За детето, самото пишување дава посебно значење и сериозност, особено ако знае тоа и да го прочита. Уште поинтересно е можните заеднични или самостојни активности да ги напишете на парчиња хартија кои ги ставите во стаклена тегла и да извлекувате по едно во моментите на досада.
- Кога станува збор за играчки, не претерувајте. Децата брзо се заситуваат и во еден момент нема да им значат ништо. Бараат нови, и нови и така до бескрај, што ја губи смислата. Ограничете го бројот на расположливи играчки за детето да се врзе с нив, да се заигра и да развие афективен однос кон нив.
Досадата не мора да биде непријатно чувство. Одморот е неопходен по разните активности. Фазата на мирување ги обновува и телото и душата, може да биде пат до осмислување на нешто креативно. И на децата им е потребен одмор и време да ги обработат секојдневните активности и информации – и да не прават ништо. Ако детето не се жали дека му е здодевно, тоа значи дека има способност да ужива во сопственото друштво и имее да толерира евентуална непријатност која досадата може да му ја донесе. Тогаш вие не сте му потребни.
