Бебињата се особено чувствителни на сонце – нивната кожа е многу потенка, понежна и почувствителна од кожата на возрасните, поради што полесно се иритира и може да изгори дури и за кратко време. Таа содржи помалку меланин – пигментот што ја штити кожата од штетното УВ-зрачење – што значи дека природната заштита од сонце кај бебињата е речиси непостоечка. Дури и бебињата со потемна кожа можат да добијат сериозни сончеви изгореници, кои освен што се болни, може да доведат и до дехидратација, треска и оштетување на кожата на подолг рок.
Облекувајте го бебето во лесна, памучна облека со долги ракави и долги ногавици, и шешир со широк обод, кој ги покрива лицето, ушите и вратот
Бебињата не можат да кажат кога им е жешко, кога се чувствуваат неудобно или кога почнуваат да горат на сонцето, а уште помалку можат самостојно да се заштитат. Тие не можат да побараат сенка, да се одморат од сонцето или да побараат вода. Затоа целосно зависат од возрасните – и за правилното облекување, и за изборот на време и место на престој, и за навременото нанесување на заштитен крем. Одговорноста за нивната безбедност на сонце е целосно во вашите раце, а со внимателно планирање и неколку едноставни мерки, штетните последици може целосно да се избегнат.
СОВЕТИ ЗА ПРЕВЕНЦИЈА
Научете како да ги спречите изгорениците од сонце пред да се појават – за вашето бебе да биде среќно, безбедно и насмеано:
- Бебињата под шест месеци не треба да бидат изложени ниту на директна, ниту на индиректна сончева светлина, поради ризикот од топлотен удар. Особено избегнувајте изложување помеѓу 10:00 и 14:00 часот, кога сончевите зраци се најсилни.
- Држете го бебето постојано во сенка – под дрво, чадор на плажа. Но имајте предвид дека на рефлектирачки површини (песок, бетон, вода), чадорите ја намалуваат изложеноста на УВ-зраци за само околу 50 %.
- Облекувајте го бебето во лесна, памучна облека со долги ракави и долги ногавици, и шешир со широк обод, кој ги покрива лицето, ушите и вратот.
- Кај бебиња под шест месеци може да се нанесе крем за заштита од сонце, но само на мали, откриени делови од кожата – како лицето, тилот, рацете, ушите и стапалата. Облеката и шеширот, сепак, треба да останат примарна заштита.
- Нанесете заштитен крем 15 до 30 минути пред да излезете надвор. Запомнете: ниеден сончев крем не е целосно водоотпорен, па потребно е повторно нанесување на секои 1,5 до 2 часа, особено ако бебето влегува во вода. Следете ги упатствата на производот.
