Многу тинејџери редовно консумираат кофеин, без разлика дали преку кафе, енергетски пијалаци или дури и чоколадо. Истражувањата покажуваат дека речиси четвртина од тинејџерите консумираат кофеин повеќето денови во неделата. Но, според новите насоки на нутриционистите, тинејџерите треба целосно да го избегнуваат кофеинот бидејќи тоа може да има сериозни последици по нивното здравје и развој.
Експерти од неколку реномирани организации, меѓу кои и Американската академија за педијатрија и Американското здружение за срце, издадоа препораки во кои се наведува дека децата и тинејџерите треба да пијат само вода и обични млечни напитоци, додека целосно да избегнуваат пијалаци со шеќер, вештачки засладувачи и кофеин.
Зошто кофеинот е проблематичен за децата и тинејџерите?
Кофеинот е природен стимуланс кој се наоѓа во повеќе од 60 растенија, вклучувајќи кафе, чај и кола орев. Сепак, покрај природните извори, често се додава во разни пијалаци и прехранбени производи, како што се енергетските пијалаци и чоколади. Експертите предупредуваат дека кофеинот може да предизвика зависност, да предизвика проблеми со спиењето, висок крвен притисок, анксиозност, а во случај на ненадеен прекин на консумирање, непријатни симптоми на повлекување, како што се главоболки и раздразливост.
Еден од главните проблеми е тоа што многу пијалаци, кои се популарни меѓу тинејџерите, се преполни со огромни количини на кофеин. Некои енергетски пијалоци содржат помеѓу 200 и 300 милиграми кофеин, што е висока доза дури и за возрасни. Премногу кофеин може да доведе до несоница, забрзано чукање на срцето, вртоглавица, дехидрација, па дури и зависност од кофеин.
Педијатрите предупредуваат дека долгорочните животни навики се формираат во адолесценцијата, па затоа е подобро да се избегнуваат пијалоци кои содржат кофеин додека мозокот се уште се развива.
