Кога повеќето луѓе ќе го слушнат изразот „хиперсензибилно дете“, можеби прво ќе помислат на мало дете кое плаче и за најмала ситница што му се случува. Меѓутоа, родителите на хиперсензибилни или многу чувствителни деца знаат дека во прашање е нешто многу повеќе од интензивни чувства.
Имено, како што објаснуваат психолозите, таквите деца имаат нервен систем кој брзо реагира на речиси секоја промена, а тоа е појава кој се јавува кај 20 отсто од децата. Постојат одредени знаци кои укажуваат на тоа дека детето може да биде преосетливо или хиперсензибилно.
Еден од најчестите знаци што го покажуваат преосетливите деца е покажувањето голема емпатија. Таквите деца не се само емоционално реактивни, туку се и исклучително емпатични. Гледањето на луѓе што ги сакаат како се вознемирени или поминуваат низ лоши моменти, често може да ги поттикне и тие да се вознемират. Како што велат психолозите, хиперсензибилните деца чувствуваат се што чувствуваат и поминуваат луѓето околу нив.
Освен големата емпатичност, преосетливите деца често претерано размислуваат за работите што им се случуваат или што допрва ќе се случат. Тоа може да се види во нивните обмислени прашања, прераната употреба на големи зборови откако ќе ги слушнат само неколку пати или во потешкотиите при донесувањето одредени одлуки бидејќи размислуваат многу за сите можности.
Кога станува збор за дисциплинирање на преосетливите деца, кај нив казнувањето и покачените тонови не функционираат, објаснуваат психолозите. Имено, поради нивната моќна перцепција и обработка на информациите, на многу чувствителните деца им е потребен понежен пристап.
„Хиперсензибилното дете ќе го интернализира сето она што ќе го кажете, а секое викање ќе го доживува како закана“, објаснуваат психолозите, кои затоа ги советуваат родителите мирно да им пристапуваат на чувствителните деца и да избегнуваат секаков вид строга казна.
