„Животот ве обликува, но не ве подготвува за ситуации како оваа“, се вели во објавата на Агенцијата за цивилна заштита на Мексико, која објави фотографија од бебето и оставената порака на социјалните мрежи
Машко новороденче било пронајдено напуштено во кутија за пица на една пуста улица во Мексико.
Локалните жители во четвртокот го пронашле момчето, старо една недела, завиткано во ќебе и оставено во кутија за пица, во градот Тлалтенанго. Покрај него, имало оставено срцепарателна порака, напишана за мајката на бебето, која починала при породувањето.
„Грижете се за мојот внук“, пишувало во пораката на шпански јазик.
„Мојата ќерка умре на породувањето и немам начин да го издржувам. Се надевам дека ќе има подобар живот и дека Бог ќе ми прости“.
Бебето било однесено во болница на преглед. Агенцијата за цивилна заштита на Мексико објави фотографија од бебето и оставената порака на социјалните мрежи.
„Животот ве обликува, но не ве подготвува за ситуации како оваа“, гласела објавата.
Следејќи ја објавата, која стана вирална, неколку луѓе се понудија да го посвојат момчето. Додека бебето не го најде своето ново семејство, градоначалникот на Тлалтенанго, Мигел Ангел Варело Пинедо изјави дека тој ќе биде одговорен за трошоците околу бебето.
„Тажно е да се слушне дека бебето е напуштено поради недостаток на финансиски средства“, напишал градоначалникот на Фејсбук.
„Јас ќе се грижам за трошоците околу бебето онолку долго колку што ќе биде потребно. Нека почива во мир твојата света мајка и Бог нека и прости на баба ти, како што пишува во писмото“.
Момчето е крстено Ангел Габриел во чест на луѓето во Тлалтенанго.
Градоначалникот исто така побарал од гувернерот на Закатекас да се осигура дека момчето ќе биде посвоено од некој од регионот.
