Досегашните истражувања и студии упатуваат на тоа дека девет од 10 бремени жени ќе добијат стрии во текот на бременоста. Вообичаено се појавуваат околу 6 и 7 месец од бременоста, но одредени ризик фактори може да ја зголемат веројатноста за добивање стрии.
Наследност
Генетиката игра важна улога за многу работи, па ниту појавата на стрии не е исклучок. Ако вашата мајка добила стрии за време на бременоста, причина за тоа може да бил недостатокот на еластин – сврзно ткиво кое спречува пукање на кожата. Во тој случај, поголеми се шансите и вие да имате сличен квалитет на кожата и може да имате слични последици на растегнување на кожата во бременоста.
Возраст
Постојат бројни медицински аргументи кои одат во прилог на бременоста во раната возраст, но избегнувањето на стрии не е еден од нив. Младата кожа е како ново ластиче – цврсто и напнато, па ако премногу се растегне, под притисок, може да пукне. Како кожата старее, природно почнува да ја губи цврстината, така што не се растегнува толку, како што расте телото.
Брзо таложење на телесна тежина
Стриите се појавуваат кога кожата не може да оди во чекор со брзото ширење на телото. Постепеното добивање на тежина за време на бременоста, можеби е единствената работа на која може да влијаете кога е во прашање превенцијата на стрии. Исто така, можете да внимавате да не добиете над препорачаните максимални 16 килограми, ако пред бременоста сте имале нормална тежина.
Пубертет
Хормоналните промени може да придонесат за чувствителност на кожата и да ја направат поподложна на пукање. Ако тинејџерските години оставиле трага на вашите колкови, стомак, гради или задник, во иднина може тоа да се повтори.
