Денес секое четврто бебе страда од сува кожа. Поради тоа, тоа е склоно кон кожни болести, како егзема. Со оглед дека бебешката кожа е почувствителна од на возрасните, важно е да се знае како да се грижите за кожата на бебето.
ПРИЧИНИ ЗА СУВА КОЖА КАЈ БЕБЕ
Кога бебето се раѓа, на почетокот е прекриено со слузна обвивка од амнионската течност. Во првите неколку дена, кожата на бебето се уште не е адаптирана на сувата околина и може да се развијат подрачја на сува кожа и црвенила. Сувиот воздух, особено во зимскиот период, како и затоплувањето во домот, може да ја исуши влагата од кожата на бебето.
Повеќето родители секојдневно го капат бебето, за да бидат сигурни дека тоа е чисто. Но, многумина не знаат дека токму секојдневното капење може дополнително да ја исуши бебешката кожа. Препораките се во зимскиот период, детето да се капе поретко, оти и студеното време дополнително делува на исушувањето на кожата.
ПРЕВЕНЦИЈА И ЛЕКУВАЊЕ
По препорака и консултација со лекар, може во собата на бебето да се стави навлажнувач на воздухот, за полесно да се контролира процентот на влага во воздухот. Кога го изнесувате детето надвор, задолжително заштите му ги дланките на бебето. Избегнувајте пенливи купки и миризливи сапуни, бидејќи тие ги елиминираат природните маснотии од кожата. Малку масло за кaпење без мирис при капењето е доволно кожата на детето да остане хидрирана и мека.
За капење користете топла, не жешка вода, оти кожата на бебето е многу чувствителна. Не го капете бебето предолго, тоа значи не повеќе од 10 минути. Кожата по капењето сушете ја со нежни тапкања, и по потреба нанесете крема, масло или млеко за нега на бебешка кожа, за кои сте се консултирале со педијатар.
Редовно прегледувајте ја кожата на бебето и проверувајте дали е сува или црвена. Најдобро е ако се јават суви регии и црвенило, педијатар да направи преглед и да утврди дали станува збор за минлива состојба, или се работи за посериозен проблем.
