„Да го овозможеме доењето! Да им помогнеме на вработените родители!“, е мотото под кое Светската асоцијација за доење (WABA) ја одбележува Светската недела за доење, која трае од 1 до 7 август.
СЗО и УНИЦЕФ препорачуваат децата да започнат со доење во првиот час од раѓањето и да бидат исклучиво доени во првите 6 месеци од животот – што значи во тој период да не им се дава друга храна или течности, вклучително и вода
Жените не треба да избираат помеѓу доењето на своите деца и нивната работа, порачуваат од СЗО, во рамки на кампањата за Светската недела на доење, која претставува глобална кампања за подигање на свеста и поттикнување активности на теми поврзани со доењето.
Доењето е еден од најефикасните начини за обезбедување на здравјето и опстанокот на детето. Но, и покрај препораките на СЗО, помалку од половина од доенчињата под 6 месеци се на ексклузивно доење.
„Мајчиното млеко е идеална храна за доенчињата. Безбедно е, чисто и содржи антитела кои помагаат во заштитата од многу чести детски болести. Мајчиното млеко ја обезбедува целата енергија и хранливи материи што му се потребни на доенчето во првите месеци од животот, и продолжува да обезбедува до половина или повеќе од нутритивните потреби на детето во текот на втората половина од првата година и до една третина во текот на втората година од животот“, објаснуваат од СЗО.
Децата кои се доени имаат подобри резултати на тестовите за интелигенција, имаат помала веројатност да имаат прекумерна тежина или да бидат дебели и се помалку склони кон дијабетес подоцна во животот. Жените кои дојат исто така имаат намален ризик од рак на дојка и јајници.
Препораки на СЗО и УНИЦЕФ
СЗО и УНИЦЕФ препорачуваат децата да започнат со доење во првиот час од раѓањето и да бидат исклучиво доени во првите 6 месеци од животот – што значи во тој период да не им се дава друга храна или течности, вклучително и вода.
Доенчињата треба да се дојат по потреба – онолку често колку што детето сака, дење и ноќе. Не треба да се користат шишиња или цуцли.
Од шестмесечна возраст, децата треба да почнат да јадат безбедна и соодветна дополнителна храна додека продолжуваат да се дојат до две години или повеќе.
Децата кои се доени имаат подобри резултати на тестовите за интелигенција, имаат помала веројатност да имаат прекумерна тежина или да бидат дебели и се помалку склони кон дијабетес подоцна во животот. Жените кои дојат исто така имаат намален ризик од рак на дојка и јајници
Д-р Мими Кимовска-Христова, претседателка на поткомитетот за доење: Мајчиното млеко треба да биде достапно во секое време
Светската недела на доењето (од 1 до 7 август) во земјава се одбележа со прес конференција во Министерството за здравство на која присуствуваа претставници од поткомитетот за доење, во рамки на Комитетот за безбедно мајчинство.
Според претседателката на поткомитетот за доење, д-р Мими Кимовска-Христова, специјалист педијатар-неонатолог, мајчиното млеко е храна, лек и дететето мора да го прима, и таа треба да биде достапна во секое време и во секоја институција, а доењето на работно место, како што гласи и мотото на годинешниот светски ден, претставува глобален предизвик, што треба да се реши што поскоро.
Институтот за јавно здравје објави „Водич за доење“
Ексклузивното доење е камен-темелник на преживувањето на детето и здравјето на детето бидејќи обезбедува суштински, незаменливи исхрана за раст и развој на детето. Служи како прва имунизација на детето – обезбедување заштита од респираторни инфекции, дијареални заболувања и други потенцијални опасности по животот на детето, објаснуваат од Институтот за јавно здравје на РСМ. На нивната веб-страница е објавен и „Водич за доење“, кој го подготви Одделот за здравствена промоција и следење на болести при Институтот за јавно здравје, согледувајќи ја потребата за подигнување на свеста за бенефитите од доењето.
