Дали му дозволувате на вашето дете да ваја глина и да користи ножици?
Рускиот невролог и психолингвист Татјана Черниговскаја открива зошто е важно во детството да се работи многу на развојот на фината моторика кај децата.
„Соочени сме со многу тешка задача – се наоѓаме на на раскрсница помеѓу луѓе кои пишуваат текстови според научни трудови и читаат квалитетни книги, и луѓе кои читаат „хипертекстови“, воопшто не знаат да пишуваат, се угледуваат на познати личности и не знаат основна граматика“, вели таа.
Постојано се зборува за тоа каква е денешната младина, дека новите генерации стануваат се полоши, понеписмени, поарогантни… Татјана Черниговскаја има објаснување:
„Важно е да сфатиме дека ваквите луѓе имаат поразличен мозок. Нам тоа ни изгледа интересно и се чини дека нема никаква опасност. Но, постои опасност.
Ако мало дете што тргнало на училиште не научило убаво да пишува, ако не се навикне на мали, деликатни движења на моливот, ако во градинка ништо не вајало, обликувало, ако не знае да ракува со ножици, ако не знае да наниже перли на конец, тогаш неговата фина моторика не е развиена“.
„Сето ова подоцна се одразува и на функциите на говорот и дикцијата. Ако на време не ја развиете фината моторика кај децата, подоцна немојте да се жалите што мозокот не им работи“, вели Черниговскаја, а пренесува српски „Курир“.
