Она што сите го паметиме како деца се патувањата со нашите родители. Спакувани сендвичи, малку овошје и пијалоци во термоси и впуштање во авантура. Она што вашите деца ќе го помнат се сеќавања на квалитетното време поминато со вас во некоја нова авантура надвор од дневната рутина.
Секој татко сака да биде најдобар и да им пружи на своите деца моменти во кои ќе уживаат заедно. Еве дел од искуствата што секое дете и татко треба да ги поминат заедно.
Скокање во баричките после дожд
Чиста забава за сите! Вистина е дека подоцна ќе имате влажни чорапи, патики и извалкана облека, но сето тоа ќе се исуши и испере. Забавните моменти и насмевките ќе останат со вас многу подолго од мократа облека.
Гледајте цртани филмови и филмови со омилените суперхерои
Не постои дете кое не сака барем еден суперхерој. Нивните натприродни моќи, спасување на светот и борба против негативците едноставно се восхитувачки. Суперхероите се важни за децата, а исто така ги учат и на одговорностите кон другите, особено на послабите од нив самите. Играјте си улоги. Со тоа што ќе станат суперхерои во играта, децата добиваат одреден вид контрола. Таквата игра може да им помогне да одглумат и самостојно да решат одредени стравови. Исто така, експериментирањето со различни личности може да доведе до заклучок за тоа што луѓето навистина сакаат да бидат.
Изградете тврдина во дневната соба
Набавете кутии, маса, столови, перници, ќебиња… се што да ви треба за да ја изградите заедно најдобрата тврдина на светот. Потоа земете фенерче, грицки играчки, и уживајте играјќи во вашата тврдина. Пуштете ја вашата фантазија на слобода и забавата нека започне!
Она што вашите деца ќе го помнат се сеќавања на квалитетното време поминато со вас во некоја нова авантура надвор од дневната рутина
Подигнете ги на рамена
Ова е нешто во кое сите деца уживаат подеднакво како и татковците. Нови височини, возбуда и смеа се загарантирани. Татковците можат да го сторат тоа, тие се како силна тврдина за децата да можат да се искачат и да го видат светот храбро и од безбедно растојание.
Играјте и гледајте го вашиот омилен спорт
Кошарка, фудбал, ракомет, тенис – пронајдете го омилениот спорт на вашето дете и играјте со него. Тренирајте, научете ги правилата, одете на натпревари. Тоа е врска што ќе ви остане за цел живот. Заедничка активност во која ќе уживате и двајцата и ќе споделувате интерес.
Дружење резервирано за татковците и нивните принцези
Изнесете ја својата миленичка на сладолед, на сокче или во парк. Времето кое го поминувате заедно ќе ви помогне да создадете подлабока врска и да се запознаете подобро. Продолжете да го правите ова и кога вашата ќерка ќе порасне. Ќе ги цените оние моменти кога можете отворено да зборувате за сè, дури и кога вашата ќерка ќе порасне од принцеза во возрасна жена.
Забавувајте се заедно
Трчајте, танцувајте, скокајте, правете гримаси, смејте се еден на друг и сè останато што ќе ви падне на ум. Ова не е резервирано само за помалите деца. Сите деца, па дури и тинејџерите ќе уживаат во овој вид забава. Опуштете се и забавувајте се со вашите деца.
Врската со вашите деца ќе се гради низ годините, преку многу искуства што ќе ги поминете заедно. Ова се само некои од примерите за тоа што можете да правите со своите деца и како да си поминете убаво. На крајот, не е ни важно што ќе правите, туку какви сеќавања ќе ви останат и односот што ќе го изградите преку нив.
