На повеќето родители им се допаѓа потоплото време бидејќи тоа значи дека, кога не е ладно и нема дожд, децата можат да бидат повеќе надвор. Меѓутоа, жештините може да бидат опасни за децата, а ние ви донесуваме неколку работи што е важно да ги знаете за да ги заштитите дури и кога сонцето сјае.
Бебе на сонце
Кога станува збор за бебиња, погрижете се никогаш да не им е премногу топло и држете ги подалеку од сонце. Бебињата помлади од шест месеци не треба да бидат изложени на директна сончева светлина. Дури и постарите бебиња треба да се држат подалеку од сонце колку што е можно повеќе, особено во лето и во периодите помеѓу 11:00 и 15:00 часот, кога сонцето е најсилно.
Ако излегувате надвор кога е жешко, закачете чадор за сонце на количката за да го заштитите вашето дете од директна сончева светлина. Не ја покривајте количката со пелени или нешто слично, бидејќи тоа лесно може да доведе до прегревање и со тоа да го загрози животот на бебето. Редовно проверувајте го бебето за да се осигурате дека не му е премногу жешко.
Не го облекувајте детето во премногу слоеви облека и изберете полесна, изработена од пријатни и воздушести, природни материјали.
Доколку бебето е постаро од шест месеци, нанесете крема за сончање со заштитен фактор (СПФ) од најмалку 50 (кремата за сончање не се препорачува за бебиња помлади од шест месеци). Уверете се дека производот штити и од UVA и од UVB зраци. Многу брендови произведуваат креми за сончање наменети за бебиња и мали деца, а овие производи имаат помала веројатност да содржат адитиви што можат да ја иритираат кожата.
Уверете се дека користите доволно крема за сончање и дека ја нанесувате редовно (на секои два часа). Повторно нанесете ја веднаш по пливање или потење.
