Кога прв пат треба детето да се однесе на стоматолог? Се поправаат ли воопшто млечните заби со оглед дека имаат нежна конструкција?
Секогаш се поставува прашањето кога детето прв пат треба да посети стоматолог, а тоа е токму периодот околу првата година од животот. Со оглед дека млечните заби се еднакво важни како и трајните, важно е да се сфати дека грижата за нив мора да биде за цел живот, а тоа значи да родителите први мораат да бидат свесни за тој факт и да водат грижа за нив. Потребно е забите редовно да се мијат, наутро и навечер и редовно, на секои три месеци да се посетува стоматолог, чија задача е да со превентивни методи спречи појава на кариес.
Пред првата посета, детето треба да се подготви така што ќе му објасните каде оди и што таму ќе прави. Најдете цртани анимирани ликови кои ќе му помогнат да ја сфати целта.
При првата посета на стоматолог, децата се запознаваат со околината и со персоналот и целта е кај детето да се влее доверба и да се создаде близина, за да секоја следна посета биде со радост, а не да му претставува траума. Во тоа, најважна улога имаат родителите кои со позитивен став и сопствен пример треба да влијаат на севкупниот впечаток.
Млечните заби по својата градба се разликуваат од трајните и треба исто да се чуваат, што значи дека ако на млечниот заб има кариес, тогаш ток исто се поправа како и трајниот заб. Но, целта на превентивната терапија не е поправање на кариесот, туку со превентивни методи да се делува да не дојде до кариес. Во таа смисла, улогата на лекарот е и да ги едуцира родителите како и на кој начин да ја одржуваат оралната хигиена за да инциденцата на кариес биде што помала.
