По блескавиот, забрзан и украсен декември во кој сè се врти околу празниците, подароците, семејните дружења и вкусните јадења, доаѓа време е да ги собереме украсите во кутии и да ги исклучиме светилките. Сè стивнува, па неминовно, стивнуваме и ние. Како ритамот на целото семејство да се менува и како да е потребна посебна сила за да се надминат сивите и студени денови кои ни претстојат, сега кога веќе не го очекуваме Божиќ.
Да, ни доаѓа добро познатиот јануарски блуз (оваа година 15 јануари е прогласен за најдепресивен ден) со кој покрај родителите се борат и децата. Ниту ним не им е лесно, по целата врева, содржина, исчекување на Дедо Мраз и други возбудувања, наеднаш да останат во тишина.
Како да се победи јануарскиот блуз, кој се почесто се јавува кај децата?
Јади, спиј, движи се – повтори!
Време е да се вратиме на нормална, здрава рутина на исхрана, спиење и движење, која за време на празниците можеби и не се почитувала.
Секако, тоа не значи дека вашето дете ќе го ставите на диета, но по деновите на прекумерно јадење слатки, време е малку да се зголеми внесот на овошје и зеленчук. Исто така, оброците треба да бидат нутритивно богати и секогаш во исто време, наместо да се грицка по цел ден.
Исто така, имајте на ум дека се ближи крајот на распустот и децата ќе се вратат во колективот. Треба да поработите и на навиките за спиење. Во последниве денови можеби си легнувале малку подоцна отколку што се навикнати, па време е добро да се наспијат.
И на крајот – движење. А кој сака да излезе надвор кога е толку студено, сиво и непривлечно? Но, неопходно е да се излезе на свеж воздух и да се истегне, и тоа не само за физичкото, туку и за менталното здравје.
Расчистете го нередот
Нема подобар месец да се воведе ред, да се ослободите од старото и да го прифатите новото. Охрабрете ги децата да ги прегледаат работите во нивните соби и да го одделат она што долго време не го користеле и она што го „надраснале“. Веројатно добиле многу нови работи за празниците, па време е тие да заземат почесно место на полиците.
Во крајна линија, чистењето и расчистувањето на нередот делува има релаксирачки ефект и го намалува стресот.
Испланирајте нешто забавно
Враќањето во секојдневието значи помалку време со семејството, затоа искористете ги деновите што доаѓаат за забавни семејни активности. Можете да правите се што е забавно што ќе донесе насмевка на лицата на децата. Времето за релаксација позитивно влијае на нивната самодоверба, расположение и го намалува стресот.
Изберете заедничко одење во кино, на лизгање на мраз, прошетка во природа, куглање или вечер со друштвени игри.
