Три реченици што може да го повредат детето, иако тоа не го сакате

Родителството е единствената „школа“ во која влегуваме без упатства, и се учиме во движење. Затоа секому се случува, под стрес, умор или брзање, да излезе со реченица што може да го повреди детето – иако никогаш тоа не ни е намерата. Некои од овие реченици можеби и сами сте ги слушнале како дете и несвесно ги пренесувате понатаму. Но, стручњаците велат дека е важно да ги препознаете и да ги замените со подобри опции. Еве три најчести реченици што е подобро да се избегнуваат – и што можеш да кажете наместо нив:

 

1. „Ме растажуваш кога го правиш тоа.“

Можеби ви звучи како начин детето да ја сфати сериозноста, но всушност тука ги пренесувате своите емоции врз него. Стручњаците предупредуваат дека таквата реченица му дава на детето чувство дека е одговорно за својата тага и фрустрација – што создава товар што не треба да го носи.

Подобра верзија: „Не ми е во ред ова однесување. Ајде да се договориме што ќе направиме сега.“

2. „Па, требаше веќе да го знаеш тоа.“

Ова често излегува кога сме исцрпени, но детето всушност слуша: „Не си доволно паметно.“ Наместо да го поттикнете, оваа реченица создава срам и одбрана — што значи дека детето ќе се обиде уште помалку да ве слуша.

Подобра верзија: „Ајде да пробаме уште еднаш заедно.“ или „Знам дека учиш и ти треба малку повеќе време.“

3. „Ајде, пушти, јас ќе го направам.“

Кога доцните или губите трпение затоа што детето се мачи со нешто „едноставно“, лесно е да го преземете тоа во свои раце. Но детето тогаш добива порака дека не е способно, што може да го демотивира — особено ако станува збор за задача што скоро ја совладало.

Подобра верзија: „Гледам дека се трудиш, ти треба малку помош или сакаш да пробаш уште еднаш сама/сам?“