Во текот на бременоста, под влијание на хормоните доаѓа до бројни физиолошки промени во телото на жената. Како последица на овие промени, неретко се јавува отекување на непцата, кои можат да бидат чувствителни и црвени, а крвавењето може да се појави најмал контакт, како што е четкање или миење на забите.
Ваквото воспаление на непцата во текот на бременоста се нарекува труднички гингивитис.
Зачестеноста на трудничкиот гингивит е толкава, да над 50% од бремените жени во одреден момент се соочуваат со оваа состојба. Најчесто се јавува во второто тромесечје, но може да се јави и порано, особено ако постоело воспаление и пред бременоста.
На првиот пренатален преглед, докторот кој ви ја води бременоста, особено ќе ви ја истакне важноста од одење на стоматолог и спроведувањето соодветна орална хигиена, оти компликациите од трудничкиот гингивитис може да донесат сериозни ризици по жената, како и да го зголемат ризикот од предвремено породување.
ПРИЧИНИ
Под влијание на хормонот прогестерон доаѓа до зголемување на крвотокот во телото на жената, и со тоа и доток на крв во непцата, со што тие може да станат почувствителни, болни и отечени.
Болките во непцата, но и утринските мачнини, може да и отежнат на бремената жена да извршува адекватна орална хигена .
Несоодветната орална хигена може да поттикне задржување на наслаги на забите со што се нарушува нивното здравје и се создава подлога за таложење на бактерии.
Покрај тоа, хормоналните промени може да оневозможат соодветен одговор на телото на бактериите, што го зголемува ризикот за појава на периодонтални инфекции во бременоста.
РИЗИЦИ
Периодонтитиот е компликација која се јавува од трудничкиот гингивитис, кој може да се прошири и до коските. Доколку дојде до оваа состојба, бебето може да биде под ризик од предвремено породување, но и други здравствени компликации.
КАКО ДА СПРЕЧИТЕ КРВАВЕЊЕ НА НЕПЦАТА?
За да го спречите трудничкиот гингивитис, најважн е редовната и темелна орална хигена, а таа подразбира:
- Миење на забите најмалку два пати дневно – наутро и навечер.
- Кај чувствителните непца подобро е да користите мека четка, која не ги иритира непцата.
- Задолжително користите и конец за заби, со оглед дека тесниот простор меѓу забите не е возможно да се исчисти само со четка.
- Редовно користите течност за испирање на устата која дополнително спречува настанување и развој на бактерии.
- Редовно посетувајте стоматолог, кој навреме може да ги забележи сите симптоми на трудничкиот гингивитис и да ви даде совети за превенција
КОГА ДА СЕ ОБРАТИТЕ КАЈ СТОМАТОЛОГ?
Веднаш кога ќе почувствувате било каква промена на забите или непцата.
Препорачливо е да се посети стоматолог по влез во второто тромесечје од бременоста, бидејки во тој период безбедно е да се применува анестезија и евентуални лекови.
Понекогаш во бременоста може да се појави и т.н. “труднички епикулис“, односно јазол на непцата кој може да крвави за време на миењето на забите. Во прашање е ткиво кое само од себе исчезнува по породувањето, а ако ви пречи стоматологот може да го извади.
