Кога детето е тврдоглаво или има многу добра природа, често велиме дека е такво на мајка му или татко му. Иако научниците не знаат точно што најмногу влијае на карактерот на детето, дали тоа е околината, гените или воспитувањето, многу истражувања покажале дека децата не го наследуваат само физичкиот изглед од родителите, туку и некои особини.
Некои од овие карактеристики е речиси невозможно да се променат, а една од работите што децата ја наследуваат од родителите се фобиите и екстровертноста. Утврдено е дека постои и генетска врска помеѓу АДХД и хиперактивноста.
Кога станува збор за смислата за хумор, се верува дека тоа е стекната особина која зависи од средината во која расте детето, додека, на пример, чувствителноста на стресот се пренесува од родителите на децата. Според досегашните сознанија, доколку мајката била под голем стрес за време на бременоста, можно е детето да биде почувствително на стрес подоцна во животот.
Децата, исто така, наследуваат тенденција да штедат пари од своите родители, што значи дека некои од нив имаат генетска предиспозиција за штедење, без разлика на приход, пол или образование. Сепак, ракувањето со пари е секако нешто што може да се научи во текот на животот.
Гените играат важна улога кога станува збор за музичкиот талент, особено кога станува збор за бојата на гласот или препознавање на ритам. На овој талент секако може да се работи за да се подобри, но некои аспекти на музичкиот талент се исклучиво наследни, што значи дека не можат да се научат.
Меѓутоа, кога се ќе се собере и одземе, многу зависи од воспитувањето, а не само од карактерот.
“Децата се раѓаат со некои рани знаци на нивната личност, а тоа се нарекува темперамент. Обично е видливо во првите денови или недели од животот на бебето. Се верува дека помеѓу 20 и 60 отсто од темпераментот зависи од генетиката”, вели детскиот психолог д-р Џесика Мизак.
